ჩაკვე ისევ მაგარია: გიორგიმ დიდებული პასით გაატანინა

გიორგი ჩაკვეტაძემ კვლავ შესანიშნავი მატჩი ჩაატარა ბრატისლავას „სლოვანის“ შემადგენლობაში, რომელიც ავსტრიაში შეკრებაზეა და მეორე მატჩი ადგილობრივ „სანკტ პოლტენთან“ 2:2 დაასრულა.

სამივე ქართველი ძირითად შემადგენლობაში იყო: გურამ კაშია, ჯაბა კანკავა (ორივე 72-ე წუთზე შეცვალეს) და გიორგი ჩაკვეტაძე.

54-ე წუთზე ავსტრიელებმა რეალური საგოლე მომენტი შექმნეს, მაგრამ კაშიამ ბურთი კარის ხაზიდან გამოიტანა.
„სლოვანიდან“ ყველაზე მწვავედ ჩაკვეტაძე უტევდა და 69-ე წუთზე გოლი ქართველის წამოწყებული შეტევით გავიდა. გიორგიმ ბურთი საკუთარ საჯარიმოსთან მიიღო, კარისკენ დაიძრა, მარცხენა ფლანგზე მცველს გასცდა და შესანიშნავი პასით მეკარესთან პირისპირ ვლადიმირ ვაისი უმცროსი დატოვა.

87-ე წუთზე ჩაკვეტაძემ საჯარიმოში მცველი მოატყუა და გატანა სცადა, მაგრამ მეკარემ საიმედოდ ითამაშა.

აღსანიშნავია, რომ ჩაკვეტაძემ პირველად ითამაშა 10-ნომრიანი მაისურით.

„სლოვანი“ 28 იანვარს ავსტრიის ჩემპიონატის ლიდერ „ზალცბურგს“ შეხვდება.