შოთამ ბიჭები შეკრიბა: ჰალ სიტიმ ახალი სეზონისთვის მზადება უკვე დაიწყო

მომქანცველი სეზონი სულ ახლახანს დასრულდა, მაგრამ ყატარში გასამართმა მსოფლიო ჩემპიონატმა, რომელიც ნოემბერში აიღებს სტარტს, ყველაფერი თავდაყირა დააყენა. შესაბამისად, ყველა ჩემპიონატი იმაზე ადრე იწყება, ვიდრე ჩვეულებრივ აიღებდა სტარტს. მაგალითისთვის, პრემიერ ლიგა 5 აგვისტოს ისტარტება, ხოლო ჩემპიონშიფი 1 კვირით ადრე, 30 ივლისს გამართავს პირველ მატჩებს.

დღეს, ვეფხვები საწვრთნელ ბაზაზე შეიკრიბნენ და პირველი ვარჯიშიც გამართეს. გასულ სეზონში არველაძემ ინგლისელი მაკქეინი ჩაანაცვლა და გუნდი მე-19 ადგილზე გაიყვანა.

ჯერჯერობით სიჩუმეა სატრანსფერო კუთხით. მოარული ხმების თანახმად, „ჰალ სიტის“ ახალი მფლობელი აჯუნ ილიჯალი მოლაპარაკებებს მესუტ იოზილთან აწარმოებდა, მაგრამ ეს ხმები მოარულადვე დარჩა. იწერებოდა გიორგი მიქაუტაძისა და საბა ლობჟანიძის შესახებაც, მაგრამ ჰალი ჯერ დუმს.