ვის შეხვდება საქართველო ოლიმპიადაზე… ოღონდ ჯერ გავიდეთ

შვეიცარიის ქალაქ მიესში ოლიმპიადის წილისყრა გაიმართა.

პირველად, დამოუკიდებელი ქართული კალათბურთის ისტორიაში, საქართველოს ეროვნული ნაკრები ოლიმპიური თამაშების საკვალიფიკაციო ტურნირში იასპარეზებს. ალეკსანდარ ჯიკიჩის გაწვრთნილი ჩვენი ეროვნული გუნდი კიდევ 5 ნაკრებთან ერთად ოლიმპიადის 1 საგზურისთვის 2-დან 7 ივლისის ჩათვლით, ლატვიის დედაქალაქ რიგაში იბრძოლებს.

ერთ ქვეჯგუფში საქართველოსთან ერთად ლატვია და ფილიპინები მოხვდნენ, ხოლო მეორე ქვეჯგუფში – ბრაზილია, კამერუნი და მონტენეგრო. პირველი და მეორეადგილოსნები ნახევარფინალში შეხვდებიან, შემდეგ ფინალი ჩატარდება, რომელშიც გამარჯვებული ოლიმპიადის საგზურს მოიპოვებს.

გაირკვა, რომ რიგის ტურნირის გამარჯვებული ოლიმპიადაზე B ჯგუფში მასპინძელ საფრანგეთთან, გერმანიასთან და იაპონიასთან ერთად ითამაშებს.

ოლიმპიადის საკალათბურთო ტურნირი 27 ივლისიდან 11 აგვისტოს ჩათვლით, საფრანგეთის ქალაქ ლილში ჩატარდება. როგორც გითხარით, 8 მონაწილე უკვე ცნობილია.
დარჩენილი 4 საგზურისთვის საქართველოსთან ერთად კიდევ 23 ქვეყნის ნაკრები იბრძვის

წილისყრის შედეგები:

A ჯგუფი: ავსტრალია, კანადა, საბერძნეთის საკვალიფიკაციოს გამარჯვებული, ესპანეთის საკვალიფიკაციოს გამარჯვებული;

B ჯგუფი: საფრანგეთი, გერმანია, იაპონია, ლატვიის საკვალიფიკაციოს გამარჯვებული;

C ჯგუფი: სერბეთი, სამხრეთ სუდანი, აშშ, პუერტო რიკოს საკვალიფიკაციოს გამარჯვებული.