კიტემ პირველი ტაიმი ითამაშა, გუგეშაშვილის გუნდმა კინაღამ სენსაცია დადო

ჩემპიონთა ლიგის შემდეგ ტრადიციულად გაიმართა ევროპა ლიგისა და კონფერენს ლიგის შეხვედრები.

წინასწარ ცნობილი იყო, რომ ოთარ კიტეიშვილის „შტურმი“ გავარდებოდა, რადგან ავსტრიულმა გუნდმა პირველი თამაში შინ წაააგო 0:3 ფრანგულ „ლილთან“. განმეორებითი მატჩი კი ფრედ 1:1 დასრულდა.
კიტეიშვილი ძირითადში იყო და შესვენებაზე შეცვალეს. მისი თამაში sofascore-მა 6.6 ქულით შეაფასა, flashscore-მა კი – 6.2-ით.

ცოტა დააკლდა სენსაციამდე ლუკა გუგეშაშვილის „ყარაბახს“, რომელიც წელს უძლეველ ლევერკუზენის „ბაიერს“ 2:0-ს უგებდა, მაგრამ ბოლო, 90-ე წუთზე ორი გოლი გაუშვა და 2:3 წააგო. პირველ შეხვედრა 2:2 დასრულდა.
ქართველი მეკარე სათადარიგო იყო.

ევროპალიგის მეოთხედფინალში გავიდნენ: “ბენფიკა”, “მილანი”, “მარსელი”, “ვესტ ჰემი”, “ატალანტა”, “რომა”, “ლევერკუზენი”, “ლივერპული”.

კონფერენსლიგის მეოთხედფინალისტები არიან: “ფენერბაჰჩე”, “ფიორენტინა”, პაოკ, “პლზენი”, “ასტონ ვილა”, “ბრიუგე”, “ლილი”, “ოლიმპიაკოსი”.

წილისყრა დღეს გაიმართება.