მიქაუტაძის ჰეთ-რიკი: ქართველი ფორვარდი ბრწყინვალე ფორმაშია

ბელგიის თასის 2021/22 წლების გათამაშების საკვალიფიკაციო რაუნდში გიორგი მიქაუტაძის “სერენმა” სტუმრად ქართველი ფორვარდის ჰეთ-თრიკით 3:0 დაამარცხა “ლოკერენი” და თასის მე-6 ეტაპზე, ანუ 1/16-ფინალში გავიდა.

მიქაუტაძემ ანგარიში მე-7 წუთზე გახსნა, ბერნიე-მარიუსის კომბინაცია 20 წლის ფორვარდმა ახლო მანძილიდან იოლი გოლით დაასრულა. ეს მისი პირველი გოლია, “სერენში” იჯარით დაბრუნების შემდეგ.

მეორე გოლი შესანიშნავი გამოვიდა – ბურთი ცენტრში მიიღო და მეტოქის კარისკენ დაიძრა, ორი მცველი მოატყუა და შემდეგ დუელი “ლოკერენის” მეკარესაც მოუგო. ეს მატჩის 54-ე წუთზე მოხდა.

88-ე წუთზე მან ანგარიშს წერტილი დაუსვა.

“ვინ, თუ არა ჟორჟი”, წერდა “სერენის” ოფიციალური გვერდი ტვიტერზე, როცა მიქაუტაძემ ჰეთ-თრიკი შეასრულა.

შეგახსენებთ, რომ გიორგი მიქაუტაძე მეც-მა სატრანსფერო ფანჯრის დახურვამდე კვლავ 1-წლიანი იჯარით გაუშვა ბელგიურ “სერენში”, რომელიც ახლა იუპილერ ლიგაში თამაშობს. “ლოკერენთან” მატჩამდე მიქაუტაძემ ჩემპიონატში “სტანდარდთან” შეცვლაზე ითამაშა. გასულ სეზონში მან “სერენის” მაისურით 24 მატჩში 22 გოლი გაიტანა.