რეპეტიცია განწყობისთვის გამოვიდა: საქართველომ კვიპროსი დაამარცხა

საქართველოს ახალგაზრდულმა ნაკრებმა, უეფა-ს 21-წლამდე ევროპის ჩემპიონატამდე ბოლო ამხანაგური შეხვედრა თბილისში, განახლებულ მიხეილ მესხის სახელობის სტადიონზე კვიპროსის წინააღმდეგ ჩაატარა და მეტოქეს – 2:0 მოუგო.

შეხვედრაში პირველი გოლი მე-3 წუთზე, 21-წლამდე ნაკრების დებიუტანტმა – გიორგი წიტაიშვილმა გაიტანა, რომელმაც გიორგი მოისწრაფიშვილის გადაცემა ზუსტად გამოიყენა. სხვაობა ორამდე, წიტაიშვილის მიერ ჩამოწოდებული კუთხურის შემდეგ, 51-ე წუთზე საბა ხვადაგიანმა გაზარდა, რომელმაც ახალგაზრდული ნაკრების მაისურით მეორე გოლის გატანა შეძლო.

გიორგი წიტაიშვილის გარდა, 21-წლამდე ნაკრების რიგებში დებიუტი ჰქონდა ნოდარ ყალიჩავას, რომელმაც ლუკა კუტალაძე 84-ე წუთზე შეცვალა.

საქართველო – კვიპროსი 2:0

გოლები: 1:0 წიტაიშვილი (3. მოისწრაფიშვილის პასით), 2:0 ხვადაგიანი (51. წიტაიშვილის პასით).

საქართველო: ლუკა კუტალაძე (84. ნოდარ ყალიჩავა), საბა საზონოვი, ივა გელაშვილი, ალექსანდრე კალანდაძე, საბა ხვადაგიანი (60. ცოტნე კაპანაძე), გიორგი მოისწრაფიშვილი (75. გაბრიელ სიგუა), ნიკა გაგნიძე (84. შოთა ნონიკაშვილი), ნოდარ ლომინაძე (60. ოთარ მამაგეიშვილი), გიორგი წიტაიშვილი (84. ლევან ნონიკაშვილი), გიორგი გულიაშვილი, გიორგი გაგუა (75. ნიკა ხორხელი).

შეგახსენებთ, რომ Საქართველოს ახალგაზრდული ნაკრები, ევროპის ჩემპიონატის ჯგუფურ ეტაპს 21 ივნისს, დინამო არენაზე, პორტუგალიასთან მატჩით გახსნის.

U21 | მატჩების განრიგი
21 ივნისი | საქართველო V პორტუგალია | 20:00
24 ივნისი | საქართველო V ბელგია | 20:00
27 ივნისი | საქართველო V ნიდერლანდები | 20:00

უეფას 21-წლამდე ევროპის ჩემპიონატი საქართველოსა და რუმინეთში 21 ივნისიდან 8 ივლისის ჩათვლით გაიმართება. თამაშები საქართველოს სამ ქალაქში – თბილისში, ქუთაისსა და ბათუმში გაიმართება. ევროპის ჩემპიონატის ფინალურ შეხვედრას, 8 ივლისს, ბათუმი არენა უმასპინძლებს.

ახალგაზრდულის შემადგენლობა ცნობილია: ორი მთავარი კაცი არ იქნება

მატჩებზე დასასწრები ბილეთების შეძენა სპეციალურ ვებგვერდზე, under21tickets.ge-ზეა შესაძლებელი.