პეტრიაშვილი ზარესთან დამარცხდა და მსოფლიოზე ვერცხლის მედალი მოიპოვა

27 წლის ქართველი მოჭიდავე გენო პეტრიაშვილი (125 კგ.) ნორვეგიის დედაქალაქ ოსლოში მიმდინარე მსოფლიოს ჩემპიონატზე ვერცხლის მედლის მფლობელი გახდა.

გენოს შანსი ჰქონდა ზედიზედ მე-4 ოქრო მოეგო, თუმცა, ფინალური ორთაბრძოლა უშანსოდ დათმო.პეტრიაშვილმა ფინალში ირანელ მძიმეწონოსან ამირ ჰოსეინ აბას ზარესთან პირველი 2 ქულა აიღო, თუმცა, შემდეგ მეტოქის უპირატესობა აშკარა იყო და მან 9:2 იმარჯვა. აღსანიშნავია, რომ ზარემ ნახევარფინალში 4:0 მოუგო ოლიმპიურ, მსოფლიოს 2-გზისა და ევროპის 8-გზის ჩემპიონ ტაჰა აკგულს (თურქეთი), რომელიც ძველ დიდებას ნელ-ნელა კარგავს.

პეტრიაშვილმა ფინალამდე გზიდან მონღოლი ლხაგვაგერელ მუნხტური (11:1), ავსტრიელი იოჰანეს ლუდეშერი (5:0) და ყაზახი ოლეგ ბოლტინი (4:0) იოლად ჩამოიცილა.