ნეიმარი პელეს სჯობია, ოღონდ არ სჯობია: ახალი რეკორდი ბრაზილიის ნაკრებში

ნეიმარი ბრაზილიის ნაკრების რეკორდსმენი გახდა გატანილი გოლებით.

აწ უკვე „ალ ჰილალის“ ფორვარდმა ეროვნულ გუნდში 78-ე და 79-ე გოლები გაიტანა, დუბლი შეასრულა და ბრაზილიას ბოლივიის დამარცხებაში დაეხმარა – 5:1 მუნდიალის შესარჩევში.

ამრიგად, ნეიმარმა გადაასწრო პელეს, რომლის ანგარიშზე 77 გოლი იყო.
ამასთან ნეიმარმა ნაკრებში 125 მატჩი ჩაატარა, ხოლო პელემ – 91.

რეკორდზე აზრი გამოთქვა თავად რეკორდსმენმაც.

„ძალიან მიხარია, სიტყვები არ მყოფნის. ვერასოდეს წარმოვიდგენდი ამ რეკორდს თუ მოვხსნიდი.
მინდა ვთქვა, რომ ეს არ ნიშნავს, რომ მე პელეზე უკეთესი ვარ ან ნაკრების რომელიმე სხვა მოთამაშეზე. ყოველთვის მინდოდა ნაკრებში საკუთარი ისტორია დამეწერა და დღეს ეს შევძელი“.