მორიგი სუპერტრანსფერი? მბაპე და რეალი კვლავ აქტუალურია

ლიონელ მესის ტრანსფერის შემდეგ ყველაზე იმაზე ლაპარაკობს, რომ პარი სენ-ჟერმენს მსოფლიოში საუკეთესო თავდასხმა ეყოლება – მესის, ნეიმარისა და კილიან მბაპეს ტრიო წინა ხაზზე მართლაც ზღაპრულად ჟღერს. პარალელურად, ისევ გააქტიურდა საუბრები, რომ შესაძლოა, პარიზულ გრანდის წინა ხაზი შეიცვალოს: დიდია ალბათობა, რომ ამ დღეებში პსჟ კილიან მბაპემ დატოვოს.

RMC Sport იტყობინება, რომ მბაპემ პსჟ-ს კონტრაქტის გაგრძელებაზე უარი უთხრა, რაც იმას ნიშნავს, რომ ფრანგ სუპერვარსკვლავს პარიზული გრანდის დატოვება სურს და თანაც, ახლავე. საქმე ისაა, რომ მბაპეს პარი სენ-ჟერმენთან კონტრაქტი გაისად ეწურება და თუ ახალს ახლავე არ გააფორმებს, ერთ წელიწადში უფასო იქნება.

ცნობილი არ არის, რა ხელფასი შესთავაზა პსჟ-მ მბაპეს ახალი კონტრაქტის სანაცვლოდ. სანდო მედიაში მხოლოდ ის იწერება, რომ პარიზელები მას უკეთეს პირობებს და 5-წლიან ხელშეკრულებას სთავაზობდნენ. RMC-ის ინფორმაციით, მბაპეს უარის შემდეგ პარიზული გრანდის ხელმძღვანელებმა მის გაყიდვაზე ფიქრი უკვე სერიოზულად დაიწყეს.