იტალიასთან აღარ გამოვიდა: საქართველომ ევრობასკეტზე მეორე თამაში წააგო

საქართველოს ნაკრებმა ევრობასკეტზე ჯგუფური ეტაპის მეორე მატჩი იტალიასთან გამართა და დამარცხდა – 62:78 (10:18, 22:14, 15:21, 15:25).

იტალია ჩვენი უხერხული მეტოქეა, ახლა უკვე 14 მატჩიდან 14-ვე მოგვიგო.

სასტარტო ხუთეული იგივე იყო, რაც წინა ტურში ესპანეთთან: ბოლდუინი, სანაძე, მამუკელაშვილი, შენგელია, ბითაძე.

არადა, არც ისე იყო საქმე, რომ შეხვედრა ასეთი ანგარიშით დასრულებულიყო.
პირველი ტაიმი ფრედ მორჩა – 32:32. ვჩენი გუნდი ძალიან კარგი იყო შეხვედრის მეორე პერიოდში, რომელიც 22:14 მოიგო.

მეორე ტაიმში ერთი პერიოდი კარგად ვიყავით, მაგრამ თანდათან უპირატესობა იტალიის მხარეს გადავიდა, სამიანებიც წაუვიდა, ხოლო გადამწყვეტი გაქცევა მესამე მეოთხედის შუაში მოაწყო, აი მეოთხე მეოთხედის დასაწყისში კი 10:0 გაქცევა შეძლო და მატჩის ბედიც მაშინ გადაწყდა.

საქართველოს ნაკრების რიგებში ყველაზე შედეგიანი 22 ქულით გოგა ბითაძე იყო (მთლიანად მატჩის ბომბარდირი), 13 ქულა ჰქონდა სანდრო მამუკელაშვილს, 9 ქულა – კამარ ბოლდუინს, 8 – დუდა სანაძეს, 7 – ბექა ბურჯანაძეს, 3 – რატი ანდრონიკაშვილს.

ერთი ცუდი ამბავიც: მატჩის ბოლოს თორნიკე შენგელიამ მსაჯების გადაწყვეტილება მწვავედ გააპროტესტა, რის გამოც მოედანი დაატოვებინეს. საქართველოს ნაკრების კაპიტნის საკითხს სადისციპლინო კომიტეტი განიხილავს და გადაწყვეტილებას მიიღებს, დიდი შანსია დისკვალიფიკაციის. ისე, იშვიათი რამ მოხდა და შენგელიამ ერთი ქულაც ვერ მოუტანა გუნდს (3 მოხსნა და 5 ასისტი).

მომდევნო, მესამე მატჩს საქართველო ხვალ, 31 აგვისტოს საბერძნეთთან ითამაშებს. ეს შეხვედრაც 16:00 საათზე დაიწყება.