აქ თავს მართლა კარგად ვგრძნობ: პსჟ-ს ინტერვიუ ხვიჩასთან

პსჟ-ის ოფიციალურ საიტზე გამოქვეყნდა საკმაოდ ვრცელი ინტერვიუ ხვიჩა კვარაცხელიასთან, რომელიც საფრანგეთში პირველ ნაბიჯებს იხსენებს და ყურადღებას ჩემპიონთა ლიგის ნახევარფინალურ თამაშზე აკეთებს.

ხვიჩა, პარიზში რამდენიმე თვის წინ ჩამოხვედი… როგორ ეჩვევი?

ვფიქრობ, ყველაზე რთული ის არის, რომ ზამთრის ტრანსფერი მწვრთნელისთვისაც შეიძლება არ იყოს მარტივი, რადგან გუნდს სეზონის შუაში უერთდები. ადაპტაციის პერიოდი ხანმოკლეა, მაგრამ ვფიქრობ, საკმაოდ კარგად გავიარე, პრეზიდენტის, პერსონალის, მწვრთნელების, კლუბის და, რა თქმა უნდა, ფეხბურთელების წყალობით, რომლებმაც თბილად მიმიღეს. აქ თავს ძალიან კარგად ვგრძნობ და ეს მხარდაჭერა მეხმარება უკეთესად თამაშში.

გულშემატკივრებმა უკვე მიგიღეს…

ის ფაქტი, რომ ასე სწრაფად მიმიღეს ოჯახში და რომ თავი ძალიან ბედნიერად და კომფორტულად ვიგრძენი, ნამდვილად დამეხმარა მოედანზე ჩემი ადგილის პოვნაში. პირველივე წუთიდან გულშემატკივრების ძლიერი მხარდაჭერა ვიგრძენი. შემდეგ, როდესაც მოედანზე შევედი, თავი შესანიშნავ ფეხბურთელად ვიგრძენი. ეს ყველაფერი ამ კლუბის დამსახურებაა: ის ისე გხვდება, რომ საშუალებას გაძლევს, საკუთარი თავის გჯეროდეს და გააცნობიერო შენი, როგორც მოთამაშის, ღირებულება. ჩემი პირველი შთაბეჭდილება ის იყო, რომ თავს მაღალი დონის ფეხბურთელად ვგრძნობდი, რომელიც დიდ კლუბს შეუერთდა და ეს მოთამაშისთვის ბევრს ნიშნავს.

ასევე, გქონდათ შესაძლებლობა, დაგეთვალიერებინათ პსჟ-ის კამპუსი. რას ფიქრობთ ამაზე?

ნამდვილად არაფერზეა საწუწუნო: აქ ყველაფერი უმაღლესი დონისაა. ჩვენ გვაქვს ყველა შესაძლებლობა, ინდივიდუალურად ვივარჯიშოთ და სწრაფად აღვიდგინოთ ძალები. პსჟ-ს კამპუსი სრულად აღჭურვილია. ეს ძალიან გვეხმარება, განსაკუთრებით იმის გათვალისწინებით, რომ ამდენი მატჩი მხოლოდ სამი დღის ინტერვალით ტარდება. ჩვენ ვიყენებთ სავარჯიშო ცენტრის ყველა რესურსს, რომ აღარაფერი ვთქვათ ფსიქოლოგიურ მხარდაჭერასა და სამედიცინო პერსონალზე: ისინი ყოველთვის ჩვენს გვერდით არიან. გჭირდებათ დასვენება თუ პერსონალიზებული ვარჯიში, ამ ადგილას ყველაფერია, რაც გჭირდებათ. თქვენ მხოლოდ ფეხბურთსა და ვარჯიშზე უნდა გაამახვილოთ ყურადღება, ყველაფერ დანარჩენზე კი კლუბი იზრუნებს. როდესაც უყურებთ ახალგაზრდული აკადემიის მოთამაშეებს, მათ განკარგულებაში არსებულ ობიექტებს, აშკარაა, რომ კლუბი მნიშვნელოვან როლს ასრულებს მათ განვითარებაში.

ქალაქზე რას იტყვით?

ყველამ იცის, რომ პარიზი მსოფლიოში ერთ-ერთი ულამაზესი ქალაქია და ძალიან ბედნიერი ვარ, აქ რომ ვარ და ამ კლუბში ვთამაშობ. გულწრფელად ვთქვა, ეს წარმოუდგენელია. ყველაფერი იდეალურად წარიმართა: მე შესანიშნავ ქალაქში ვცხოვრობ და დიდი კლუბის ნაწილი ვარ. ვფიქრობ, ქალაქი მნიშვნელოვან როლს ასრულებს, განსაკუთრებით მაშინ, როდესაც ოჯახი გყავს. მნიშვნელოვანია, რომ ადგილი კომფორტული და მშვიდი იყოს. მე და ჩემი ოჯახი აქ თავს სახლში ვგრძნობთ, ნამდვილად ბედნიერები ვართ. მინდა მადლობა გადავუხადო ჩემს ყველა თანაგუნდელს ჩემი მიღებისთვის და კლუბისა და ადგილობრივი ცხოვრების შესახებ ამდენი რამის მოყოლისთვის.

გვიამბეთ თქვენს ურთიერთობაზე ლუის ენრიკესთან?

მწვრთნელის როლი ფეხბურთელის კარიერაში უაღრესად მნიშვნელოვანია. მისი ხასიათი და ფეხბურთელებისადმი დამოკიდებულება მომაჯადოებელია. ის გაგრძნობინებს, როგორც მოედანზე, ასევე მის გარეთ, რომ ყველაფერი უნდა გაიღო კლუბისთვის და გულშემატკივრისთვის. ის დიდი პატივისცემითა და სიცხადით გექცევა. ყველამ ვიცით, როგორი მწვრთნელია, მაგრამ პირადად ჩემზე, ყველაზე მეტად მისმა ადამიანობამ მოახდინა შთაბეჭდილება, ფეხბურთელებთან ურთიერთობისა და ფეხბურთის ისტორიის მოყოლის მანერამ.

თქვენ ახლახან გახდით საფრანგეთის ჩემპიონი. როგორი შეგრძნებაა?

ცხადია, ძალიან მიხარია, რომ ტიტული მოვიგეთ. ამის მიუხედავად, ჯერ კიდევ ბევრი მიზანია წინ. კიდევ ორი ტიტულის მოგების შანსი გვაქვს და ყველაფერს გავაკეთებთ ამის მისაღწევად. ვმუშაობთ იმისთვის, რომ მოვიგოთ ის, რაც დამსახურებულია. კონცენტრირებულები ვართ, რადგან ჯერ არაფერია გადაწყვეტილი.

სამშაბათს ჩემპიონთა ლიგაზე ლონდონში მოგზაურობით ბრუნდებით. რას ნიშნავს თქვენთვის ეს შეჯიბრი?

ჩემი აზრით, ეს, ალბათ, ყველაზე დიდი საფეხბურთო ტურნირია. ყველა ფეხბურთელის ოცნებაა მასში თამაში. ყველას სურს მისი მოგება, მაგრამ ეს წარმოუდგენლად რთულია. ამ ეტაპზე მიღწევა ნებისმიერი გუნდისთვის რთულია. სახელი ყველაფერს ამბობს: ჩემპიონთა ლიგა. უნდა ვიყოთ კონცენტრირებულები საკუთარ თამაშზე.

თქვენი გოლი „ასტონ ვილას“ წინააღმდეგ გადამწყვეტი აღმოჩნდა ამ ორთაბრძოლაში…

როდესაც ჩემპიონთა ლიგის ნახევარფინალში გასვლას ისახავ მიზნად და ასეთ გადამწყვეტ მომენტში, შინ, გულშემატკივრების წინაშე და შენი გუნდისთვის გოლი გაგაქვს… ეს, ალბათ, ყველაზე მნიშვნელოვანი, ყველაზე ბედნიერი და ყველაზე ემოციურია.

„ლივერპულისა“ და „ასტონ ვილას“ შემდეგ, ინგლისურ კლუბთან კიდევ ერთი დაპირისპირების დროა.

ერთი მხრივ, ეს შესანიშნავია, მაგრამ მეორე მხრივ, შესაძლოა არც ისე, რადგან ისინი ჩვენს მატჩებს სწავლობენ. ჩვენც ყურადღებით ვაკვირდებით მათ თამაშებს. ნამდვილად პოზიტიურია, რომ ახლა უკეთ გვესმის ინგლისური ფეხბურთი, განსაკუთრებით მას შემდეგ, რაც ისეთ გუნდებთან ვითამაშეთ, როგორებიც არიან „ლივერპული“ და „ასტონ ვილა“ არიან. მათთან დაპირისპირება ადვილი არ იყო, მაგრამ ჩვენ ყველაფერი გავაკეთეთ. ვფიქრობ, ეს დადებით გავლენას მოახდენს და „არსენალის“ წინააღმდეგ დაგვეხმარება.