როდის ითამაშებს ხვიჩა პსჟ-ში და ითამაშებს თუ არა საერთოდ ჩემპიონთა ლიგაზე

ხვიჩა კვარაცხელია უკვე პარიზშია, დღეს სამედიცინო შემოწმებას გაივლის და პსჟ-ის ფეხბურთელი ოფიციალურად გახდება.

წასვლამდე ქართველმა ფეხბურთელმა აწ უკვე ყოფილი თანაგუნდელები საწვრთნელ ბაზაზე შეკრიბა და სიტყვით მიმართა.

ხვიჩამ თითოეული სიხარულისა თუ განცდისთვის ყველას მადლობა გადაუხადა და აღნიშნა, რომ „ნაპოლი“ მუდამ მის გულში იქნება.

რაც შეეხება ახალ გუნდს, კვარაცხელიას დებიუტი პსჟ-ში სავარაუდოდ 26 იანვარს შედგება – ლიგა 1-ის მე-19 ტურში პარიზელები „რეიმსს“ უმასპინძლებენ.

აი ჩემპიონთა ლიგაზე საქმე უფრო რთულადაა. პსჟ 23 იანვარს შინ „სიტის” ეთამაშება, მაგრამ ჯგუფურ ეტაპზე კვარას თამაშის უფლება არ აქვს.

საქმე ისაა, რომ გუნდები განაცხადებს ჯგუფური ეტაპის დაწყებამდე წარადგენენ და მის დასრულებამდე ახალ ფეხბურთელს განაცხადში ვეღარ შეიყვანენ. მოკლედ, პსჟ-მა ჯგუფური ეტაპი უნდა დაძლიოს კვარაცხელია ჩემპიონთა ლიგაზე რომ ვიხილოთ.

ჯგუფური ეტაპის დასრულებამდე ორი ტურია დარჩენილი, ხოლო პსჟ-ს ჯგუფიდან გასვლის საკითხი დიდი კითხვის ნიშნის ქვეშაა.
პარიზელები 25-ე ადგილზე არიან, პლეი-ოფის საგზურს კი 24 გუნდი მიიღებს.