აი ეს არის მოგზაურობა, მაგრამ ჯერ არ დაგვიმთავრებია: რონალდომ 1200 მატჩი ითამაშა - ვინ არის მასზე წინ

საუდის არაბეთის ჩემპიონატის მე-16 ტურში „ალ-ნასრმა“ შინ „ალ-რიადი“ 4:1 დაამარცხა.

კრიშტიანო რონალდოსთვის ეს იყო კარიერაში 1200-ე მატჩი. ფეხბურთის ისტორიისა და სტატისტიკის საერთაშორისო ფედერაციის მონაცემებით, პორტუგალიელი მინდვრის პირველი მოთამაშეა, ვინც ამ მაჩვენებელს მიაღწია. მასზე წინ კი ოთხი ფეხბურთელია და ოთხივე მეკარე: პეტერ შილტონი (1375 – ინგლისი), პოლ ბესტოკი (1286 – ინგლისი), როჟერიუ სენი (1237 – ბრაზილია) და ფაბიო ლოპესი (1212 – ბრაზილია).

„კიდევ სამი ქულა!
მადლობელი ვარ ყველა იმ პარტნიორის, რომლებიც დამეხმარნენ 1200 მატჩამდე მოვსულიყავი.
აი ეს არის მოგზაურობა! მაგრამ ჩვენ ჯერ არ დაგვიმთავრებია“, – დაწერა 38 წლის ფეხბურთელმა.

„ალ-რიადის“ წინააღმდეგ ანგარიში სწორედ რონალდომ გახსნა. მერე საგოლე პასიც მიითვალა. ჩემპიონატის 15 მატჩში მის ანგარიშზე 16 გოლია. ის ტურნირის საუკეთესო ბომბარდირია.