ჩვენები ევროთასებზე: ვინ და სად მოხვდა

ევროტურნირების საკვალიფიკაციო ეტაპის პლეი-ოფის საპასუხო მატჩებში ქართველი ლეგიონერების გუნდებმა მიიღეს მონაწილეობა.

ევროპა ლიგა

„სლოვანმა“ „იანგ ბოიზთან“ ორივე შეხვედრა წააგო (2:3, 0:1) და კონფერენს ლიგაზე გააგრძელებს ასპარეზობას.

ბრატისლაველთა გუნდის მცველმა გურამ კაშიამ 56-ე წუთამდე ითამაშა.

„პაოკმა“ ხორვატიაში 0:1 წაგების შემდეგ სახლში „რიეკა“ 5:0 გაანადგურა და ორრაუნდიან დაპირისპირებაში გამარჯვებული გამოვიდა.

სალონიკელთა მეკარე ლუკა გუგეშაშვილი ისევ სათადარიგო იყო.

კონფერენს ლიგა

რფს-მ „ჰამრუნთან“ ორრაუნდიანი დაპირისპირება დათმო (2:2, 0:1) და გათამაშებას გამოეთიშა.

რიგელთა შემტევი ლაშა ოდიშარია, რომელიც „ხიხონში“ აპირებს გადასვლას, კვლავ არ იყო განაცხადში.

„უნივერსიტატეამ“ „ბაშაკშეჰირს“ კვლავ სძლია (გასვლაზე 2:1 ჰქონდა მოგებული), ამჯერად საკუთარ მოედანზე 3:1 და გამარჯვებული გამოვიდა.

მასპინძელთა რიგებში ანზორ მექვაბიშვილი 77-ე წუთზე შევიდა შეცვლაზე და საგოლე პასი გააკეთა.

„შახტარისა“ და „სერვეტის“ ორივე მატჩი 1:1 დასრულდა, ექსტრა ტაიმში კი კაუნა ელიასმა“ გოლი გაიტანა და დონეცკურ გუნდს გამარჯვება მოუპოვა.

„მეშახტეთა“ რიგებში ირაკლი აზაროვი მე-100 წუთზე შევიდა შეცვლაზე.

„ლოზანასა“ და „ბეშიქთაშის“ პირველი შეხვედრა 1:1 დასრულდა, ხოლო სტამბოლში შვეიცარიულმა გუნდმა 1:0 მოიგო და საერთო ჯამში გამარჯვებული გამოვიდა.

„ლოზანაში“ გაბრიელ სიგუა 67-ე წუთზე შევიდა შეცვლაზე.

sportall.ge