შენგელიას სუპერგოლი, ბერიძის გადამწყვეტი გოლი, ლოჩოშვილი სერია ა-სკენ მიიწევს – ლეგიონერები

საბერძნეთში, ჯიმი ტაბიძისა და ლევან შენგელიას „პანეტოლიკოსი“ სტუმრად ჩავიდა უშუალო კონკურენტ „ვოლოსთან“ სათამაშოდ და ქულა აიღო – 1:1. ყურადღების ცენტრში შენგელია მოექცა. ნაკრების წევრმა უკვე პირველ წუთზე ყვითელი ბარათი მიიღო, მე-8 წუთზე კი უმაგრესი გოლი გაიტანა: საჯარიმოს კუთხიდან ბურთი შორეულ ცხრიანში ჩასვა.
ეს შენგელიას მე-2 გოლია ჩემპიონატში 17 მატჩში (პლუს ერთი საგოლე პასი). ის 84-ე წუთზე შეცვალეს, შეფასებად კი 6.8 დაუწერეს.
ტაბიძე განაცხადში არ ყოფილა.

სერია A-ში ქართველებს არ უთამაშიათ.
საბა გოგლიჩიძის „ემპოლი“ შინ „ჯენოას“ დაუზავდა (0:0). ქართველი მცველი განაცხადში იყო.
„ფროზინონე“ შინ „მილანთან“ 2:3 დამარცხდა. კვერნაძეც განაცხადში იყო და მასაც არ უთამაშია.

სერია B-ში კი ლუკა ლოჩოშვილმა ითამაშა.
„კრემონეზე“ სერია A-ში დასაბრუნებლად იბრძვის და სტუმრად ბოლოადგილოსანი „ლეჩო“ 1:0 დაამარცხა. ქართველმა მცველმა სრულად ითამაშა. ლუკა მე-13 წუთზე გააფრთხილეს.
„კრემონეზე“ 42 ქულით მ-2 ადგილზეა, ლიდერ „პარმას“ 4 ქულით ჩამორჩება, ხოლო მდევარ „კომოს“ 2-ით უსწრებს.
მომდევნო მატჩი 10 თებერვალს უკვე შინაა, „რეჯინასთან“.

გიორგი ბერიძემ თურქეთის პირველ ლიგაში გაიტანა და სუპერლიგაში გადმოსასვლელად მებრძლო „ქოჯაელისპორს“ „ადანასპორის“ დამარცხებასა და მნიშვნელოვანი გამარჯვების მოპოვებაში დაეხმარა – 1:0.
გიორგიმ მოწინააღმდეგის კარი მე-60 წუთზე აიღო.
გოლიდან ექვს წუთში, 66-ე წუთზე შეცვალეს.
მისი შეფასებაა 6.8.
ბერიძემ 15 მატჩი ჩაატარა და მის ანგარიშზე 3 გოლია.

დონეცკის „შახტარმა“, რომლის შემადგენლობაშიც სამი ქართველი ფეხბურთელი თამაშობს, თურქულ შეკრებაზე ორი ამხანაგური შეხვედრა გამართა და ორივე წააგო.
მეორე ტესტმატჩში „შახტარი“ ბოსნია-ჰერცეგოვინის „ველეჟთან“ 2:3 დამარცხდა. დონეცკელთა ძირითად შემადგენლობაში იყო ახალწვეული ლუკა ლაცაბიძე, რომელმაც ერთი ტაიმი ითამაშა, ხოლო გიორგი გოჩოლეიშვილმა მატჩი შეუცვლელად ჩაატარა.
უკრაინული გუნდის კარში გოლი ქართველმა თავდამსხმელმა, გიორგი გულიაშვილმა გაიტანა, რომელიც მეკარესთან პირისპირ დარჩა.