ქართველი ქალები ძლიერ ჯგუფში: ქალთა მუნდიალის წილისყრამ საქართველოს მეტოქეები გაარკვია

შვეიცარიის ქალაქ ნიონში ფიფას 2023 წლის ქალთა მსოფლიო ჩემპიონატის წილისყრა გაიმართა.

ავსტრალიასა და ახალ ზელანდიაში დაგეგმილი მსოფლიო ჩემპიონატის 11 საგზურისთვის, ევროპის ზონიდან 51 ნაკრები იბრძოლებს. A, B, C ჯგუფები ხუთი ნაკრებისგან დაკომპლექტდა. D-დან I-ი ჯგუფის ჩათვლით კი ექვს-ექვსი ნაკრები გადანაწილდა.

საქართველოს ქალთა ეროვნული ნაკრები წილისყრის შედეგად A ჯგუფში მოხვდა.

შვედეთი
ფინეთი
ირლანდია
სლოვაკეთი
საქართველო

უეფას ზონის ქალთა ნაკრებები 9 ჯგუფში გადანაწილდნენ. ჯგუფის გამარჯვებული ნაკრებები მსოფლიო ჩემპიონატის საგზურს ავტომატურად მიიღებენ.

მეორე ადგილზე გასული სამი საუკეთესო ნაკრები პლეი-ოფის მეორე რაუნდში ითამაშებს. პლეი-ოფის მეორე რაუნდის კიდევ ერთი საგზური საკვალიფიკაციო ეტაპზე მეორე ადგილზე გასულ მომდევნო ექვს ნაკრებს შორის გათამაშდება.

საბოლოოდ პლეი-ოფის მეორე რაუნდში ექვსი გუნდი ითამაშებს, მათგან ორი გამარჯვებული ფინალური ეტაპის საგზურს მიიღებს, ერთი ნაკრები კი კონფედერაციათა პლეი-ოფში გადაინაცვლებს, სადაც ყველა კონტინენტის 10 ნაკრებს შორის, ბოლო სამი საგზურის მფლობელი გამოვლინდება.

ქალთა მსოფლიო ჩემპიონატის საკვალიფიკაციო ეტაპის მატჩები 2021 წლის 13 სექტემბრიდან 2022 წლის 6 სექტემბრის ჩათვლით გაიმართება.

მატჩების სრული განრიგი მოგვიანებით გახდება ცნობილი.

მსოფლიოს 32 საუკეთეს ნაკრებს, ავსტრალია და ახალი ზელანდია 2023 წლის 10 ივლისიდან, 20 აგვისტოს ჩათვლით უმასპინძლებს.

ნიონში გამართულ წილისყრასთან დაკავშირებით კომენტარი საქართველოს ნაკრების მთავარმა მწვრთნელმა გააკეთა:

გიორგი ჩხაიძე: “საკვალიფიკაციო ეტაპზე საკმაოდ ძლიერ ჯგუფში მოგვიწევს თამაში. რთული მატჩები იქნება ნებისმიერ შემთხვევაში, მაგრამ ყველაფერს გავაკეთებთ, რომ ყველა მეტოქეს ღირსეულად ვეთამაშოთ და ვეცდებით, რომ მაქსიმალურად მეტი ქულა ავიღოთ. საინტერესო იქნება ასეთი გუნდების წინააღმდეგ თამაში.

ოფიციალური მატჩების გამართვამდე, დაგეგმილია საწვრთნელი შეკრება, აგრეთვე ამხანაგური თამაშები ივნისში. სწორედ ამ შეკრებაზე გამოვცდით ფეხბურთელებს სხვადასხვა პოზიციაზე და ეს იქნება ერთგვარი გაცნობითი ხასიათის შეკრება. სექტემბრიდან უკვე ოფიციალური თამაშები გველოდება, კალენდარზე მუშაობა ახლა მიმდინარეობს და მოგვიანებით გახდება ცნობილი”.

საქართველოს ქალთა ნაკრები 10 და 13 ივნისს, ორ ამხანაგურ შეხვედრას საკუთარ მოედანზე, აზერბაიჯანის ნაკრების წინააღმდეგ გამართავს.