კრისტალ პალასის ფანებმა 65 ათასი შეუგროვეს მეტოქე გუნდის მწვრთნელს, რომლის ცოლს სიმსივნე აქვს

FA თასის ჯადოქრობა.

FA თასი – მხოლოდ უძველესი საფეხბურთო ტურნირი როდია, ის ასევე ლამაზი ისტორიების გაუთავებელი წყაროა. აი “კრისტალ პალასისა” და “ჰარტპულის” მატჩის ისტორია.

2020 წელს “ჰარტპულის” მთავარი მწვრთნელის, გრემ ლის მეუღლეს ტვინის არაოპერაბელური სიმსივნის დიაგნოზი დაუსვეს, რომლის წინააღმდეგაც საფეხბურთო სამყარო, გუნდები და გულშემატკივრები გაერთიანდნენ.

ქომაგებმა 65 ათასი შეაგროვეს – ეს თითქმის 1 წლის მკურნალობის ფულია

ექიმებმა ჯემა ლის მხოლოდ 12 თვე მისცეს, მაგრამ მან უკვე ორი წელი გაძლო. ყველაფერი ნარკოტიკების წყალობით, რომლის ჩამოსატანადაც გრემ ლი გერმანიაში წავიდა: “მივედი ფარმაკოლოგთან და მთელი ჩემოდანი აბებით ავავსე. თავი პაბლო ესკობარი მეგონა. ეს იყო სამდღიანი მოგზაურობა მატარებლით და თვითმფრინავით ექიმთან ორიოდე საათის გამო. მაგრამ ეს იყო ყველაზე მნიშვნელოვანი საათები”.

ექსპერიმენტული პრეპარატი ONC201 ძალიან ძვირია, ყოველთვიური კურსი 5 000 ფუნტი სტერლინგი ღირს, პრეპარატი კი სიმსივნის განვითარებას ანელებს.

გრემ ლი ინგლისის ქვედა დივიზიონების გუნდებში თამაშობდა, წვრთნიდა “მიდლსბროს” ახალგაზრდულ გუნდს, ხოლო “ჰარტპულს” მხოლოდ 2021 წლის დეკემბრიდან ხელმძღვანელობს. ეს ისეთი სამუშაოების ჩამონათვალია, სადაც ანაზღაურება დიდი არ არის. შესაბამისად, ჯემას სამკურნალოდ ინგლისში გავრცელებული პრაქტიკა – ფონდების შეგროვება დაიწყო, რაშიც იმ გუნდების გულშემატკივრები ჩაერთვნენ, რომელშიც გრემ ლი გამოდიოდა.

თასის მატჩის წინ “კრისტალ პალასმა” შეიტყო ლის ოჯახის მდგომარეობა და 1000 ფუნტი შესწირა ფონდს, ხოლო სოცქსელებში უკვე გულშემატკივრებიც ჩართო.

გამოხმაურება საკმაოდ ეფექტიანი აღმოჩნდა. მატჩის დასრულებისას 65 ათასი ფუნტი შეგროვდა. უმეტესობა “კრისტალ პალასის” გულშემატკივრებმა გადარიცხეს. უცნობია 12-ათასიანი ტრანსფერის ავტორი. გულშემატკივრები ვარაუდობენ, რომ ეს კლუბის ერთ-ერთმა ფეხბურთელმა გააკეთა, მაგრამ მან ანონიმურად დარჩენა არჩია.

“კრისტალ პალასის” მთავარმა მწვრთნელმა პატრიკ ვიეირამ მატჩის შემდეგ გულშემატკივრებს მიმართა: “დიდი პატივისცემა ყველას, ვინც მხარს უჭერდა გრემ ლის, მის მეუღლესა და ოჯახს. Მე ვამაყობ თქვენით. ეს არის თამაშის ნამდვილად კარგი მხარე. მსგავსი ისტორიები აჩვენებს, რომ ჩვენ ნამდვილი კლუბი ვართ”.

10 ავტობუსი მეტოქეს, ლონდონში ჩასასვლელად

„კრისტალ პალასი“ ნამდვილად გულითადი მასპინძლის როლში გამოვიდა. აქციით არ შემოფარგლულა. გუნდმა “ჰარტპულის” გულშემატკივრებისთვის 10 ავტობუსი გამოყო. ეს ღირებული ჟესტია: ქალაქი ჰარტპული ქვეყნის ჩრდილო-დასავლეთით მდებარეობს, ლონდონიდან შორს, მაგრამ ბევრი იყო, ვისაც თამაშის ყურება სურდა. 10 წელიწადზე მეტია კლუბი თასის გათამაშებაში ასე შორს არ წასულა. თანაც შეხვედრა პრემიერლიგის გუნდთან! პოტენციური სტუმრების რაოდენობამ 4,7 ათასს მიაღწია.

რაც შეეხება თამაშს. აქ უკვე “კრისტალ პალასმა” შეწყვიტა სტუმართმოყვარეობა: უკვე მე-4 წუთზე მცველმა მარკ გეჰიმ გახსნა ანგარიში, ხოლო 22-ე წუთზე მაიკლ ოლისემ გააორმაგა უპირატესობა. 2:0 და 1/8 ფინალი.

ეს კიდევ ერთი ლამაზი შტრიხი საფეხბურთო სამყაროში, რომელიც “კრისტალ პალასმა” დატოვა. ფეხბურთი – მეტია, ვიდრე სპორტი!