კვარაცხელია სტრატოსფერული პასით დაბრუნდა: როგორ შეაფასეს ხვიჩას დებიუტი

როგორც იქნა, მოედანს დაუბრუნდა და ფეხბურთი ითამაშა ხვიჩა კვარაცხელიამ. წინა სეზონში გადაღლილს და ამის გამო საშინაო ევროპის ახალგაზრდული ჩემპიონატის გამოტოვების შემდეგ, ლამის მთელი ზაფხული ჰქონდა ძალების აღსადგენად. თუმცა უსაქმობა დიდხანს ვერ გასტანდა და კვარაცხელიასაც მოუწია თამაშში ჩართვა.

„ნაპოლიმ” სერია ა-ს მე-2 ტურში 2:0 დაამარცხა „სასუოლო“.

კვარაცხელია სათადარიგოთა შორის იყო და მოედანზე 61-ე წუთზე შევიდა. მან მალევე გამოიჩინა თავი და ძალიან მაგარი საგოლე პასი გააკეთა, როდესაც კაპიტანი დი ლორენცო მეკარესთან პირისპირ დატოვა და მეორე გოლი გაატანინა.

ხვიჩას პასებით თანაგუნდელებს კიდევ შეეძლოთ ეხეირათ, მაგრამ ანგარიში აღარ შეცვლილა.

პირველი გოლი ოსიმენმა პენალტიდან გაიტანა (მე-16 წთ). მე-60 წუთზე „ნაპოლიმ“ კიდევ დაარტყა პენალტი, ოღონდ რასპადორიმ ძელს მოარტყა.

კვარაცხელიას შეფასებები ასეთია:
Flashscore.com – 7.5; Sofascore.com – 7.4; Whoscored.com – 7.2.

ორი ტურის შემდეგ „ნაპოლიმ“ 6 ქულა დააგროვა და ცხრილს „მილანთან“ და „ვერონასთან“ ერთად ლიდერობს. მომდევნო შეხვედრა „ნაპოლის“ შინ უწევს „ლაციოსთან“ 2 სექტემბერს.

კვარაცხელიაზე თამაშის შემდეგ გუნდის მთავარმა მწვრთნელმაც ისაუბრა.
რუდი გარსია:
„კვარაცხელიას წინასასეზონო პერიოდში მიღებული ტრავმის გამო პრობლემა ჰქონდა, 12 დღე გაუცდა. 5-დან მხოლოდ 2 კვირა შეძლო ვარჯიში. სჯობდა მაშინ შემეყვანა მოედანზე, როდესაც მეტოქე დაღლილი იქნებოდა.
ექნებათ თუ არა რასპადორისა და კვარაცხელიას უფრო თავისუფლად მოქმედების საშუალება? კვარამ მეურვე გაურკვევლობაში უნდა დატოვოს, ბურთით თავისუფალ ზონაში შეაღწიოს, ხაზებს შორის შესვლა სჭირდება. ასე ტაქტიკური თვალსაზრისით გაცილებით არაპროგნოზირებადი ხდება“.

ქართველი შემტევის თამაში პრესამაც შეაფასა.

Calcionapoli1926 – 7 ქულა
„მოედანზე შესვლიდან რამდენიმე წუთში დი ლორენცოს გასაგიჟებელი საგოლე პასი გაუკეთა“.

Calciomercato.it – 7 ქულა
„დი ლორენცოზე პასი სტრატოსფერული იყო. როგორც კი მოედანზე შევიდა, თამაში გამოაცოცხლა“.

Tuttonapoli – 7 ქულა
„სულ რამდენიმე წამი დასჭირდა, რათა ფანებისთვის შეეხსენებინა, ვინ არის სერია A-ს მეთაური, დი ლორენცოზე გაკეთებული პასი საოცარი იყო“.

Tuttomercatoweb-ი – 7 ქულა
„როგორც კი შემოვიდა, ცეცხლი დაანთო. უმაღლესი კლასის ფეხბურთელია“.

მოგეხსენებათ, მალე ძალიან მნიშვნელოვანი სანაკრებო თამაშებია, მანამდე „ნაპოლი“ კიდევ ერთ მატჩს ასწრებს ჩემპიონატში და იმედია კვარაცხელიას ისე არ გადაღლის, რომ ნაკრების თამაშებზე უარის თქმა მოუწიოს.