ილიას ზუროსი: დარბაზი ბოლომდე უნდა გაივსოს!

იტალიის ნაკრებთან გასამართი მატჩის წინ საქართველოს ნაკრების მესაჭემ, ილიას ზუროსმა მედიასთან დასმულ შეკითხვებს უპასუხა.

ილიას ზუროსი (საქართველოს ნაკრების მწვრთნელი): იტალიის ნაკრები კარგად შეთამაშებული გუნდია, რომელიც ხარისხიან კალათბურთს აჩვენებს. აღნიშნულში კიდევ ერთხელ დავრწმუნდით წინა ტურში, როდესაც იტალიამ ესპანეთთან ბოლომდე იბრძოლა და მხოლოდ დამატებით დროში დამარცხდა. ჩვენც მძიმე ბრძოლა გვქონდა ისლანდიაში, მაგრამ ძალების აღდგენა მეტნაკლებად მოვახერხეთ. ბევრს ნიშნავს, რომ მატჩს თბილისში ვმართავთ. ქართველი ქომაგის წინაშე თამაში კალათბურთელებს დამატებით ენერგიას მატებს. იმედი მაქვს, იტალიასთან მატჩისთვის დარბაზი ბოლომდე გაივსება.