ევროლიგის ერთ-ერთი ლიდერი, ვირტუს ბოლონია, რომლის ლიდერიც თორნიკე შენგელიაა, წარმატებულ სვლას განაგრძობს. ევროლიგის მორიგ, მე-19 ტურში ბოლონიელები ბერლინს ესტუმრნენ და ადგილობრივ ალბას იოლად – 83:68 სძლიეს. ამ გამარჯვებით ბოლონიელებმა ცხრილში მე-2 ადგილი გაიმყარეს. პირველ ადგილზე კი რეალ მადრიდია, რომელმაც გასულ ტურში ფანტასტიკურ მატჩში, 4 ოვერტაიმის შემდეგ 130:126 დაამარცხა ეფესი.
ვირტუსმა მატჩის ბედი ფაქტობრივად პირველ პერიოდში გადაწყვიტა, რომელიც 26:9 მოიგო. კომფორტული ლიდერობის მოპოვების შემდეგ ბოლონიელებს საქმის სასურველ შედეგამდე მიყვანა არ გასჭირვებიათ.
საქართველოს ნაკრების კაპიტანი, რომელიც ბოლონიური კლუბის ლიდერია, ტრადიციულად სასტარტო ხუთეულში იყო. შენგელიამ მოედანზე 23:29 წუთი გაატარა და 12 ქულა, 5 მოხსნა (2 შეტევაში), 5 პასი, 1 ჩაჭრა და 1 დაფარება მიითვალა. თორნიკემ 9-დან 4 ორქულიანი და 4-ვე საჯარიმო ჩააგდო, სამქულიანი ააცილა, ბურთი 3-ჯერ დაკარგა, ერთხელ დაუფარეს, 2 პერსონალური მიიღო, მის წინააღმდეგ კი 4-ჯერ დაჯარიმდნენ.
შედეგად, შენგელიას სარგებლიანობის კოეფიციენტი 15-ს გაუტოლდა და ასეთივე მაჩვენებელი ჰქონდა დანიელ ჰეკეტს (10 ქულა, 5 მოხსნა), საუკეთესო კი ბრაიანტ დანსტონი (18) იყო, რომელმაც 12 ქულას 6 მოხსნა წაამატა.
![](https://sport4me.ge/wp-content/uploads/2024/06/Estr-for-Fortuna-300-x-250-px.jpg)
ბოლონიურ კლუბს მომდევნო მატჩი 10 იანვარს ელის, როდესაც ბელგრადში თელ ავივის მაკაბის დაუპირისპირდება (ისრაელის კლუბი ომის გამო სერბეთში თამაშობს).
GIPHY App Key not set. Please check settings