ერთს ვითხოვ: ყველაფერი დადონ გამარჯვებისთვის – ახალი მწვრთნელი წარადგინეს

საქართველოს კალათბურთელთა ეროვნული გუნდის შეკრება ახალი მწვრთნელის ხელმძღვანელობით 13 თებერვალს დაიწყო, სერბი სპეციალისტი, ალეკსანდარ ჯიკიჩი სასტუმრო “ქორთიართ თბილისში” მას-მედიას წარუდგინეს. ჩვენი ნაკრების ახალი თავკაცი საქართველოს კალათბურთის ეროვნული ფედერაციის პრეზიდენტმა, ვიქტორ სანიკიძემ და გენერალურმა მდივანმა, ლაშა გამყრელიძემ წარადგინეს.

ჯიკიჩის მისასალმებელი სიტყვა ლაკონური და საქმიანი იყო:
“დიდი მადლობა მინდა გითხრათ ყველა თქვენთაგანს იმ დიდი ინტერესისთვის, რომელიც გამოიჩინეთ და მობრძანდით. ეს დასაფასებელია. მე აქ ვარ, თქვენს წინაშე და მზად ვარ, ვუპასუხო ყველა შეკითხვას, რაც ჩვენს ნაკრების უკავშირდება”.

ეროვნული ნაკრების ახალმა მწვრთნელმა ჟურნალისტების კითხვებს შემდეგნაირად უპასუხა…

ჩვენი მიზანი ევრობასკეტი 2025-ზე მოხვედრაა, ხოლო რაც შეეხება ზაფხულში გასამართ ოლიმპიადის შესარჩევს, დაპირებები არ მიყვარს. არც წინასწარმეტყველი ვარ. კალათბურთელებისგან ერთს ვითხოვ – მოედანზე ყველაფერი ჩადონ გამარჯვებისთვის.

მოახლოებული მატჩების წინ ჩემი გუნდის მდგომარეობა მაღელვებს. ტრავმირებულები არიან დუდა სანაძე და რატი ანდრონიკაშვილი. დღევანდელი მონაცემებით, მათ დანიაში მოედანზე გამოსვლა გაუჭირდებათ, თუმცა ეს ჩვენს მიზანს არ ცვლის, ყველა ღონე უნდა ვიხმაროთ, რომ პრობლემები მოვაგვაროთ და წარმატებით გამოვიდეთ. მეტს ვერაფერს ვიტყვი, რადგან დანიის მხოლოდ გაფართოებული შემადგენლობა ვიცით. ვინ ითამაშებს უშუალოდ 23-ში, ჯერ უცნობია. სერბეთის ნაკრებში ევროლიგის კალათბურთელები იქნებიან. ძლიერი გუნდია. ევროლიგასა და ფიბა-ს შორის მიღწეულმა შეთანხმებამ ყველაზე მეტი სარგებელი სერბეთის ნაკრებს მისცა – გუნდში ევროპაში მოასპარეზე ყველა წამყვანი კალათბურთელი ითამაშებს.

ლეგიონერების გამოსვლასა და საქართველოს ჩემპიონატის მატჩებს ყურადღებით ვადევნებდი თვალს. გავიარე კონსულტაციები მწვრთნელებთან და ასე შევარჩიე გაფართოებული შემადგენლობა. თუ რომელიმე კალათბურთელი თამაშით დაამტკიცებს, რომ მე შევცდი და ნაკრებში თამაშს იმსახურებს, მას აუცილებლად მივიწვევთ.
განაცხადის მიღმა მყოფი 4 ახალგაზრდა კალათბურთელი, გიგი ნაცვლიშვილი, მათე ხატიაშვილი, ლუკა ალავიძე და ავთანდილ ბახტაძე შეკრებაზე იქნებიან. ეს ჩემი მოთხოვნით მოხდა. წინ ვიყურებით”.

2 ივლისამდე, ოლიმპიადის შესარჩევამდე ყველაფერი გაწერილია. თებერვლის მატჩების მერე ამერიკაში გავემგზავრები, შევხვდები გოგა ბითაძესა და სანდრო მამუკელაშვილს, ასევე კოლეჯთა ლიგაში მოთამაშე ახალგაზრდა კალათბურთელებს.
ეროვნული ნაკრების ახალ ნატურალიზებულ ამერიკელ კალათბურთელზე, ჯო ტომასონზე ფედერაციი პრეზიდენტმა ვიქტორ სანიკიძემ ისაუბრა…

ნატურალიზირებული კალათბურთელის შერჩევა ყოველთვის რთული პროცესია. ვფიქრობ, საბოლოოდ ღირსეული კანდიდატი შევარჩიეთ. ჯო ტომასონის მაღალ კლასზე ისიც მიუთითებს, რომ ის ახლახან ევროლიგის მაკაბიში გადავიდა. სწორედ ამიტომ არ არის აქ ჯო. ის 12-ში უნდა ჩამოსულიყო, მაგრამ გეგმები შეიცვალა. ტომასონი ნაკრებს 17 თებერვალს შეუერთდება და დანიასთან მატჩისთვის მოემზადება.

შეგახსენებთ, რომ საქართველოს ნაკრები ევრობასკეტ 2025-ის საკვალიფიკაციო ტურნირისთვის ემზადება, რომლის პირველი ფანჯრის ფარგლებშიც 23 თებერვალს დანიაში ითამაშებს, 26-ში კი თბილისში სერბეთს დაუპირისპირედება.