ერთი რამ ყველას გვაქვს დასახული, როგორც მკაფიო მიზანი: რა უნდა საქართველოს ევროპაზე – კომენტარები

საქართველოს ხელბურთელთა ნაკრები პირველად მოხვდა ევროპის ჩემპიონატზე და ამით ისტორია უკვე დაწერა. თუმცა ახლა თამასა აწეულია და დასკვნით ეტაპზეც გვსურს კარგად გამოსვლა, მიუხედავად იმისა, რომ მეტოქეები ძლიერები გვყავს. პირველი თამაში უკვე იყო და მიუხედავად წაგებისა (29:34), ძლიერი ნიდერლანდების წინააღმდეგ ჩვენი გუნდი სულაც არ ყოფილა მარტივად ჯაბანი.
ხოლო უნიჭიერესი გიორგი ცხოვრებაძე მატჩის საუკეთესო მოთამაშედაც აღიარეს.

საქართველომ ევროპა პირველად დაიწყო: წაგებით, მაგრამ კარგად – ცხოვრებაძე ყველაზე მაგარია

თამაშის შემდეგ ჩვენებმა კომენტარები გააკეთეს.

ტიტე კალანდაძე, მთავარი მწვრთნელი:
„მომდევნო მატჩში ვითამაშებთ მსოფლიოს ერთ-ერთ საუკეთესო გუნდთან (შვედეთთან), მათგან ბევრი რამ უნდა ვისწავლოთ. დიახ, კმაყოფილი ვარ ნიდერლანდებთან მატჩის ანგარიშით, მაგრამ ჩვენ უფრო მეტად უნდა განვვითარდეთ და დაცვაში უკეთ ვითამაშოთ“.

გიორგი ცხოვრებაძე:
„სამწუხაროდ წავაგეთ, მაგრამ ეს ჩვენი პირველი გამოცდილებაა და მარტო ესეც კი ბევრს ნიშნავს. ვამაყობ, რომ ქართველი ვარ და აქ ჩემს ქვეყანას წარმოვადგენ. ჩვენ უნდა გავაგრძელოთ პროგრესი და მაქსიმალურად დავიხარჯოთ. ახლა ჩვენი ამოცანაა დავინახოთ, რატომ წავაგეთ და დასკვნები გამოვიტანოთ.
ეს ჩვენი პირველი ჯილდოა ევროპის ჩემპიონატზე. არ ვცდილობდი საუკეთესო გავმხდარიყავი, უბრალოდ ვცდილობდი გუნდს გამარჯვებაში დავხმარებოდი, მაგრამ რასაკვირველია სასიამოვნოა“.

ერეკლე არსენაშვილი:
„რთულ თამაშს ველოდით, მაგრამ წარმოუდგენელი გამოცდილება იყო ამ ევროპის ჩემპიონატში მონაწილეობა. ჩვენი მიზანია კარგად ვითამაშოთ და არ დავნებდეთ. შეგრძნება საუკეთესოა, მიუხედავად იმისა, რომ მარცხით დავიწყეთ.
ჩვენ ვაჩვენეთ საბრძოლო სულისკვეთება.
ერთი რამ ყველას გვაქვს დასახული, როგორც მკაფიო მიზანი: ეს არის კარგი შედეგის მიღწევა”.