ევროპაზე საქართველოს ბილეთები 15 აპრილიდან გაიყიდება

მას შემდეგ, რაც საქართველოს ნაკრებმა ევროპის ჩემპიონატის საგზური მოიპოვა, გულშემატკივრებმა უშუალოდ ევროზე წასვლაზე ფიქრი და ზრუნვა დაიწყეს. ბუნებრივია, გერმანიაში ყველა მსურველი ვერ მოხვდება, უმალ გაძვირდა ავიაბილეთები, იმატებს სასტუმროს ხარჯები და არც ბილეთებია შეუზღუდავი. თუმცა ეჭვი არავის ეპარება, რომ გერმანულ სტადიონებზე ქართული დროშებიც იფრიალებს.

ნაკრების ფეისბუქ გვერდზე გაჩნდა ინფორმაცია, რომ ევრო 2024-ზე საქართველოს ნაკრების მატჩებზე დასასწრები ბილეთების გაყიდვა 15 აპრილიდან დაიწყება.

„უეფა-ს ბილეთების პორტალზე ქართველი გულშემატკივრებისთვის განკუთვნილი ბილეთების რეალიზაცია 15 აპრილს, 13:00 საათზე დაიწყება. დეტალურ ინფორმაციას და გზამკვლევს ჩვენი გუნდი გულშემატკივარს უახლოეს დღეეებში გავუზიარებთ“, – წერია განცხადებაში.

ბილეთების შეძენა შესაძლებელია ბმულზე http://euro2024.com/tickets