გარეთ ბეილს უცხოპლანეტელები უნახავს

„ტოტენჰემის“ ნახევარმცველი გარეთ ბეილი აცხადებს, რომ სჯერა უცხოპლანეტელების და მეტიც, თავადაც კი ნახა ისინი.

უელსელმა „მამლების“ ტვ არხის თამაშში მიიღო მონაწილეობა თანაკლუბელ ჯო როუდონთან ერთად. ფეხბურთელებს რიგ-რიგობით უნდა ეპასუხათ არასაფეხბურთო შემთხვევით კითხვებზე. პირველ ფურცელზე, რომელიც ბეილმა ამოიღო, ეწერა: „გჯერა თუ არა უცხო პლანეტიდან მოსულების?“

„არსებობს შეთქმულების მრავალი თეორია, ასევე არსებობს კადრებიც, რომელიც აშშ-ს მთავრობამ გამოაქვეყნა. 100 პროცენტით დარწმუნებული ვარ – ესენი უცხოპლანეტელები არიან. მჯერა, რომ ზოგიერთი დაკავშირებულია სამთავრობო პროგრამებთან. მე თავადაც მინახავს ისინი“, – გამოტყდა ბეილი.

ბეილის პასუხმა როუდონი მაინც და მაინც ვერ დააჯერა, მაგრამ მისი თავი აღარ ჰქონდა და ბოლოს ძალით დათანხმდა: „უბრალოდ კი-ს ვიტყვი, რათა თავი დამანებო“.

ბეილი 2022 წლის ზაფხულამდე „რეალს“ ეკუთვნის, მაგრამ „ტოტენჰემს“ 31 წლის ვარსკვლავის გამოსყიდვის უფლება აქვს.

ლონდონში დაბრუნების შემდეგ ბეილი პრემიერლიგის 13 მატჩში მონაწილეობდა და 5 გოლი გაიტანა. გარდა ამისა, ევროპალიგაზე 10 შეხვედრაში 3 გოლი და 1 ასისტი დაუგროვდა.