ბოლომდე ვერ ავხტით: იტალიამ ძლივს მოგვიგო – ბორჯღალოსნების დიდებული პირველი ტაიმი

by Vakhtang Daraselia November 17, 2024, 4:03 pm

საქართველოს ნაკრებმა ნოემბრის ტესტების მეორე მატჩში პირველი ტაიმი ბრწყინვალე სტილში მოუგო 6 ერის გუნდს – ჩვენმა გუნდმა პირველ ნახევარში სტუმრად იტალია 17:6 დაამარცხა. გავიტანეთ ორი ერთმანეთზე უკეთესი ლელო და ორივე გარდავსახეთ. თუმცა განსაკუთრებული სილამაზისა და ოსტატობის ნაზავი იყო მეორე ლელო, რომელიც დავით ნინიაშვილმა შექმნა და ვასილ ლობჟანიძემ დააგვირგვინა.

თუმცა, სამწუხაროდ, საბოლოოდ გენუაში გამართულ სპარინგში იტალიამ გაიმარჯვა – 20:17.

თამაში იტალიელებმა აგრესიულად დაიწყეს, მაგრამ ბორჯღალოსნები გაუმკლავდნენ და თანდათან თამაში გაათანაბრეს.

23-ე წუთზე ჩვენებმა სწრაფი კომბინაციით ულამაზესი ლელო დადეს: თავი აკაკი ტაბუცაძემ გამოიჩინა და თავისი მე-40 ლელო მიითვალა, ლუკა მატკავამ კი ზუსტად გარდასახა და საქართველო 7:3 გავიდა წინ.
იტალიამ საჯარიმოთი ანგარიში მალევე შეამცირა. თუმცა მატკავამ ოთხქულიანი უპირატესობა საჯარიმოდან აღადგინა.
მერე საქართველომ კიდევ ერთი ლელო მიითვალა. ნინიაშვილის წამოწყებული სწრაფი შეტევა გუნდის კაპიტანმა ვასილ ლობჟანიძემ ძელებს შორის ლელოთი დააგვირგვინა, მატკავამ ისევ გარდასახვა და 17:6 გავიჭერით.

მეორე ტაიმში ალბათ გადამწყვეტი ის ეპიზოდი აღმოჩნდა, როდესაც არბიტრმა წესების დარღვევისთვის აკაკი ტაბუცაძე 10 წუთით გააძევა, იტალიას კი საჯარიმო ლელო ჩაუთვალა – 17:13 (53-ე წთ).

ბუნებრივია, ამის შემდეგ იტალია მოგვაწვა, საქართველო მთელი გუნდით იცავდა თავს, დაღლაც დაგვეტყო, მასპინძლებმა კი ერთი ლელოს დადება მოახერხეს და ამით მოიგეს კიდეც.

იტალია – საქართველო 20:17

ხაზი: 15. დავით ნინიაშვილი, 14. აკაკი ტაბუცაძე, 13. გიორგი კვესელაძე, 12. თორნიკე კახოიძე, 11. სანდრო თოდუა, 10. ლუკა მატკავა, 9. ვასილ ლობჟანიძე (კაპ.);

შერკინება: 1. ნიკა აბულაძე, 2. ვანო კარკაძე, 3. ირაკლი აფციაური, 4. მიხეილ ბაბუნაშვილი, 5. გიორგი ჯავახია, 6. ილია სპანდერაშვილი, 7. გიორგი ცუცქირიძე, 8. თორნიკე ჯალაღონია.

მარქაფა: 16. ლუკა ნიორაძე, 17. გიორგი ახალაძე, 18. ლუკა ჯაფარიძე, 19. ლადო ჩაჩანიძე, 20. ლუკა ივანიშვილი; 21. გელა აფრასიძე, 22. თედო აბჟანდაძე, 23. დემურ თაფლაძე.