გუშინ საქართველოს ეროვნულ ჩემპიონატში სამი მატჩი გაიმართა.
გასავარდნ ზონაში მყოფმა ბოლნისის „სიონმა“ თამაზ სტეფანიას სახელობის არენაზე ბოლო ადგილოსან თბილისის „ლოკომოტივს“ უმასპინძლა და მეტოქე 5:1 გაანადგურა. ირაკლი ჭიაბრიშვილს ავტოგოლს მალევე ფოცხვერიამ დაამატა და ბოლნისელები 2 ბურთით დაწინაურდნენ, მაგრამ 24-ე წუთზე ომარაშვილმა ერთი ბურთი გაქვითა და ტაიმიც ასე დასრულდა.
მეორე ნახევარში ძმები ხორხელების ჯერი დადგა, ჯერ ლუკამ შემდეგ კი ნიკამ გაიტანა, ხოლო დასკვნითი აკორდი 81-ე წუთზე გამბარაშვილმა შეასრულა და მატჩიც 5:1 დასრულდა.
![](https://avoe.ge/wp-content/uploads/2022/10/289561636_736079544105960_5097549897776411905_n-1024x683.jpg)
მიუხედავად იმისა, რომ „სიონმა“ ბოლო 5 მატჩში 3 მოიგო და „დილას“ ფრე ეთამაშა, გუნდი მაინც გასავარდნ ზონაშია. მე-7 ადგილოსან „ტორპედოს“ ბოლნისელები 1 ქულით ჩამორჩებიან. რაც შეეხება „ლოკოს“, თბილისელებს 18 ტურში 1 გამარჯვების წილ 17 მარცხი აქვთ და უიმედო ფსკეროსანია.
![](https://sport4me.ge/wp-content/uploads/2024/06/Estr-for-Fortuna-300-x-250-px.jpg)
გიორგი ჭიაბრიშვილის დებიუტი შედგა „დინამო არენაზე“, სადაც თბილისელებმა „გაგრას“ უმასპინძლეს და 5:0 ააწიოკეს.
22-ე წუთზე ლიგის ერთ-ერთმა ყველაზე ტანდაბალმა მოთამაშემ უსმანე კამარამ შესაშური თავურით გახსნა ანგარიში. მეორე ტაიმში თავი მოისწრაფიშვილმა (პ), ოსეიმ, მექვაბიშვილმა და სხირტლაძემ გამოიჩინეს.
![](https://avoe.ge/wp-content/uploads/2022/10/289262956_520118926566657_6481451074622082881_n.jpg)
“მინდა, მადლობა გადავუხადო კახი ცხადაძეს, თავის სტაფთან ერთად… კარგი ფეხბურთელები დამხვდნენ და მინდა, რომ შემდეგ მატჩზე, ტორპედოსთან უფრო მეტი გულშემატკივარი გვყავდეს” – გიორგი ჭიაბრიშვილი ნამატჩევს.
ამ გამარჯვებით თბილისურმა „დინამომ“ ბათუმურთან ჩამორჩენა 3 ქულამდე შეამცირა, მაგრამ ზღვისპირელები თავიანთ მატჩს დღეს ჩაატარებენ.
დღის დასკვნითი მატჩი თენგიზ ბურჯანაძის სახელობის სტადიონზე, გორის „დილასა“ და წყალტუბოს „სამგურალს“ შორის შედგა.
მე-4 და მე-3 საფეხურზე მყოფ გუნდთა მატჩი ისეთი, გამოდგა, როგორი დაძაბულიც სატურნირო ცხრილია. მატჩის ერთადერთი გოლი 37-ე წუთზე თორნიკე კაპანაძემ, ვაგნერ გონსალვეშის პასით შეაგდო.
ამ გამარჯვებით „დილა“ სამგურალს გაუთანაბრდა, მაგრამ ბურთების უკეთესი ბალანსის გამო მესამეზე კვლავ წყალტუბოელები არიან.
![](https://avoe.ge/wp-content/uploads/2022/10/289358466_449818597147669_6773913715598951946_n-1024x609.jpg)
ტურის დანარჩენი მატჩები დღეს გაიმართება:
„საბურთალო“ – „თელავი“ ; „დინამო“ ბათუმი – „ტორპედო“ ქუთაისი.
GIPHY App Key not set. Please check settings