ჩაკვეტაძემ მაგარი საგოლე პასი გააკეთა: უოტფორდმა წელი მოგებით დაიწყო

გიორგი ჩაკვეტაძემ ახალი წელი შედეგიანად დაიწყო, საგოლე პასი გააკეთა, თანაც ძალიან მოხდენილი, მისმა „უოტფორდმა“ კი შინ „ბირმინგემი“ დაამარცხა – 3:0.

ჩემპიონშიპის 25-ე ტურის მატჩში ჩაკვეტაძე ძირითად შემადგენლობაში იყო. მან საკმაოდ შორეული, შესანიშნავი გადაცემა გაუკეთა ჰეთ-თრიქის ავტორ ინსს, უფრო მარჯვენა მხრიდან, მეკარის საჯარიმოსთან ჩაუგდო ბურთი თანაგუნდელს, რომელიც მეკარესთან პირისპირ აღმოჩნდა.

ათ წუთში ჩაკვეტაძემ ინსი კიდევ ერთხელ დატოვა მეკარესთან პირისპირ, მაგრამ ამ ჯერზე უშედეგოდ.

ჩაკვეტაძე შესვენებაზე შეცვალეს, ანალიტიკური საიტებისგან კი მაღალი შეფასებები დაიმსახურა: flashscore – 8.4, whoscored – 7.5, sofascore – 7.1.

უოტფორდი – ბირმინგემი 3:0
გოლები: 1:0 ინსი (9), 2:0 ინსი (39), 3:0 ინსი (60)

„უოტფორდმა“ ზედიზედ მეოთხე გამარჯვება მოიპოვა, ბოლო 7 მატჩში დაუმარცხებელია (5 მოგება და 2 ფრე), 41 ქულით მე-4 ადგილზეა და 4 იანვარს „ჰალს“ ესტუმრება.