რონალდომ კიდევ ერთი რეკორდი: ფეხბურთელის ქონებამ ერთ მილიარდ ევროს გადააჭარბა

კრიშტიანო რონალდოს კარიერა რეკორდებითაა სავსე და პორტუგალიელმა ახლახან კიდევ ერთი რეკორდი დაამყარა.

Bloomberg-ის ცნობით, ის პირველი ფეხბურთელი გახდა, რომლის ქონებამ ერთ მილიარდ ევროს გადააჭარბა და ამჟამად 1.2 მილიარდ ევროდ არის შეფასებული.

ამერიკული გამოცემის ცნობით, ფეხბურთელის ისედაც საარაკო ქონება „ალ ნასრისთან“ კონტრაქტის გახანგრძლივებამ გაზარდა, რამაც მას დამატებით 344 მილიონი ევროს გარანტია მისცა.

40 წლის ფეხბურთელმა საუდის არაბეთის კლუბთან კონტრაქტი 2027 წლამდე გაახანგრძლივა, რომელშიც ის 15%-იან წილს ფლობს.

სპორტული კონტრაქტების გარდა, Bloomberg ასევე აღნიშნავს მოთამაშის შემოსავალს რეკლამებიდან.

„კრიშტიანომ 2002-დან 2023 წლამდე ხელფასის სახით 550 მილიონ დოლარზე მეტი გამოიმუშავა. მან ასევე ხელი მოაწერა 10-წლიან კონტრაქტს Nike-თან, რომლის ღირებულება თითქმის 18 მილიონი დოლარი იყო, და სხვა გარიგებებს ისეთ ბრენდებთან, როგორიცაა Armani და Castrol, რამაც მას 175 მილიონი დოლარის შემოსავალი მოუტანა“, – იუწყება Bloomberg.

ფინანსების გარდა, კრიშტიანო ასევე სოციალური მედიის ჩემპიონია. ფეხბურთელს ყველაზე მეტი გამომწერი ჰყავს Instagram-ზე, 665 მილიონი. ამრიგად, სოცმედია შემოსავლის კიდევ ერთ მნიშვნელოვან წყაროს წარმოადგენს.

„მე მიყვარს გამარჯვება, რათა დავეხმარო მომავალ თაობებს – და ისინი ასევე მეხმარებიან ჩემი დონის შენარჩუნებაში და კონკურენციის გაგრძელებაში. სწორედ ეს მამოძრავებს: ახალგაზრდებთან კონკურენცია. მე ჯერ კიდევ ვნებიანად ვარ განწყობილი ამ სპორტის მიმართ“, – თქვა მან Channel 11-თან ინტერვიუში.

ხალხი, განსაკუთრებით ჩემი ოჯახი, ამბობს: „დროა შეწყვიტო. შენ უკვე ყველაფერი გააკეთე. რატომ გჭირდება კიდევ ათასი გოლის გატანა?“ მაგრამ მე ასე არ ვფიქრობ. მე მჯერა, რომ კვლავ ვაღწევ კარგ შედეგებს, ვეხმარები ჩემს კლუბს და ეროვნულ ნაკრებს და რატომ არ უნდა გავაგრძელო? დარწმუნებული ვარ, რომ პენსიაზე გასვლის შემდეგ შევძლებ ვთქვა, რომ სპორტს ყველაფერი მივეცი. ვიცი, რომ ამისთვის ბევრი წელი არ დამრჩა, მაგრამ ვცდილობ, რაც შეიძლება მეტი ვისიამოვნო“, – თქვა მან.