პირველობა გვინდოდა და მესამეზე აღმოვჩნდით: საქართველომ გადამწყვეტი წააგო

საქართველოს ნაკრებმა ერთა ლიგის ჯგუფურ ეტაპზე ასპარეზობა დაასრულა. წლის დასკვნით შეხვედრაში, ჩვენი გუნდი ჩეხეთის ნაკრებთან, ოლომოუცში, მინიმალური სხვაობით დამარცხდა – 1:2.

საქართველოს მოგება სჭირდებოდა და ჯგუფში პირველ ადგილზე გავიდოდა. ეს ნიშნავდა ელიტურ A დივიზიონს და მუნდიალზე წასვლის შანსს. არ გამოგვივიდა. სანამ ჩვენ აზრზე მოვედით, ჩეხებმა ორი გოლი გაგვიტანეს და მერე უკვე ამოქაჩვა შეუძლებელი გახდა.

მატჩის პირველი ნახევარი მასპინძლებმა შულცის და ჰლოჟეკის გოლებით მოიგეს. მე-60 წუთზე გიორგი მიქაუტაძემ ოთარ კაკაბაძის პასით სხვაობა შეამცირა. მიუხედავად რამდენიმე საგოლე მომენტისა, დარჩენილ დროში ანგარიში აღარ შეცვლილა.

მონდომებას ნამდვილად ვერ დავუწუნებთ ბიჭებს, ბოლომდე იბრძოლეს, მაგრამ ეს ნაადრევი გოლის გაშვება მაგრად მოქმედებს. ჩვენ უფრო მეორე ნომრად თამაში გვეკომფორტულება, გაშვებულ გოლზე კი წინ წასვლა გვიწევს და მჭიდრო დაცვასთან შეჭიდება გვიწევს. ჭირს ასე გოლის გატანა.

საქართველოს უკვე 4 მატჩია ვერ მოუგია. რაღაცას იქნებ უნდა გადახედოს სამწვრთნელო შტაბმა. შესარჩევში ყველაფერი ასე ვერ გაგრძელდება.

საქართველოს ნაკრებმა ერთა ლიგის B1 ჯგუფი 7 ქულით მე-3 ადგილზე დაასრულა. მარტში, ჩვენი გუნდი ლიგაში ადგილის შესანარჩუნებლად პლეი-ოფში C ლიგის ერთ-ერთ მეორეადგილოსანს დაუპირისპირდება. საქართველოს ნაკრების მეტოქე პლეი-ოფში 22 ნოემბერს გახდება ცნობილი.

ერთა ლიგა 2024/25. B1 ჯგუფი

ჩეხეთი – საქართველო 2:1
19.11. ოლომოუცი. “ონდრუვი”. 11 700
გოლები: 1:0 შულცი (3. კლიმენტის პასით), 2:0 ჰლოჟეკი (24), 2:1 მიქაუტაძე (60. კაკაბაძის პასით)

ჩეხეთი: კოვარჟი, ჰოლეში, იემელკა, ბორილი, ცუფალი, ჩერვი, კრალი, ჩერნი (57. პროვოდი), შულცი (88. კუხტა), კლიმენტი (57. ხიტილი), ჰლოჟეკი (73. ლინგრი)

საქართველო: მამარდაშვილი, კაკაბაძე (79. გოჩოლეიშვილი), გველესიანი (36. დავითაშვილი), კაშია, დვალი, ლოჩოშვილი, ქოჩორაშვილი, კიტეიშვილი (60. მექვაბიშვილი), ჩაკვეტაძე (61. ზივზივაძე) – კვარაცხელია, მიქაუტაძე (79. ლობჟანიძე)

სათადარიგოები: ლორია, გუგეშაშვილი, კვირკველია, კვეკვესკირი, კალანდაძე, შენგელია, წიტაიშვილი
მწვრთნელი: ვილი სანიოლი

გაფრთხილება: დვალი (23), მიქაუტაძე (35), ჰოლეში (67), კრალი (75), კვარაცხელია (90+4), ხიტილი (90+4), ცუფალი (90+4), კუხტა (90+5), კაშია (90+5)