გავედით, ბრავო: ახალგაზრდული საქართველო ევროპის ჩემპიონატზე ითამაშებს

საქართველოს ახალგაზრდულმა ნაკრებმა გმირობა ჩაიდინა და ევროპის ჩემპიონატზე გავიდა! ყოჩაღ ბიჭებო! მადლობა და საქებარი სიტყვები მწვრთნელს და ყველას, ვინც ამ შესანიშნავ გუნდში მუშაობს.

ურთულესი ბარიერი გადავლახეთ. ძალიან დაძაბულ, დრამატულ, თითქმის მოგებულ და მერე თითქმის უკვე წაგებულ მატჩში.

საქართველომ პლეი-ოფში აჯობა უძლიერეს ხორვატიას – 1:0 თბილისში, 2:3 სტუმრად და 7:6 პენალტების სერიაში.

ნახეთ რა მოხდა: გავუშვით გოლი მალევე და არ გავტყდით. ლუკა გაგნიძემ შორეული დარტყმით ცხრიანში ულამაზესად ჩასვა.
პირველი ტაიმი 1:1 – გვაწყობს.

მეორე ნახევარს ცუდად არ ვიწყებთ, მაგრამ პენალტი ჩვენს კარში და ისევ უკან ვართ (საერთო ანგარიში ჯერ ფრეა).

საჯარიმო მახვილგონივრულად გავითამაშეთ და ლომინაძემ მოხდენილად გადაატარა ბურთი მეკარეს – 2:2. ამ ანგარიშზე გავდივართ.

90 წუთი ამოიწურა. მსაჯმა 5 წუთი დაამატა.
მაინც გავუშვით. 2:3 და დამატებითი დრო.
გოლები აღარ გასულა.

პენალტების სერია.
აზაროვი აფუჭებს. მერე ყველას გააქვს, ჩვენც და იმათაც და დადგა მე-5 პენალტის ჯერი. გაიტანს ხორვატია და გადის.
ხარატიშვილი ურთულეს ბურთს იგერიებს. საოცრება.

მიდის ნერვების გლეჯა და დარტყმები პირველ გაფუჭებამდე. ვიტანთ ჩვენ, იტანენ ისინი. და ისევ ხარატიშვილი. აიღო ერთი და საქართველო ევროპაზე გავიდა.

ბრავო ბიჭებო, მადლობა ბიჭებო!

U21. ევრო 2025. საკვალიფიკაციო ეტაპი. პლეი-ოფი. საპასუხო მატჩი (პირველი მატჩი 0:1)

ხორვატია – საქართველო 3:2, პენ 6:7
19.11. რიეკა. “რუიევაცი”. 2 000 მაყურებელი
გოლები: 1:0 ბელიო (11. ბელცარის პასით), 1:1 გაგნიძე (28), 2:1 ბელიო (63-პენ), 2:2 ლომინაძე (78. აზაროვის პასით), 3:2 შოტიჩეკი (90+2. ბელიოს პასით)

ხორვატია: კოლიჩი – ვალინჩიჩი, ვუშკოვიჩი, ბადელი, შ. ჰრგოვიჩი, ზვონარეკი (46. სტოიკოვიჩი), სოლდო (85. ფრიგანი), ბელცარი (46. ჰოჯა), ცრნაცი (85. ბიუკი), ივანოვიჩი (85. შოტიჩეკი), ბელიო (96. ვიდოვიჩი)
მწვრთნელი: ივიცა ოლიჩი

საქართველო: ხარატიშვილი, ხვადაგიანი, ლაცაბიძე, უგრეხელიძე, აზაროვი, გაგნიძე (71. გ. მამაგეიშვილი), ლომინაძე, ოდიშარია (71. გორდეზიანი / 120. აბუაშვილი), ო. მამაგეიშვილი (88. მაისურაძე), მამაცაშვილი (56. სიგუა), კვერნაძე

სათადარიგოები: მაქაცარია, ოდიშვილი, მორჩილაძე, ეგოიანი
მწვრთნელი: რამაზ სვანაძე

გაფრთხილება: ხვადაგიანი (20), მამაცაშვილი (27), სტოიკოვიჩი (47), სოლდო (81)