გიორგიმ გიორგის… კაშიამ გოლი სლოვანს გაუტანა, წიტაიშვილმა პირველი პასი გააკეთა, შენგელიამ ორი ასისტი – ლეგიონერები

სანაკრებო მატჩები კი მოვილიეთ, მაგრამ მომდევნო თამაშებიც არ არის ძალიან შორს და ამიტომ ჩვენი გუნდის წევრების მდგომარეობა კვლავ ძალიან აქტუალურია. როგორი გამოვიდა ნაკრების ფეხბურთელებისთვის გასული უიქ-ენდები.

საბერძნეთში ლევან შენგელიას ოფი გამარჯვებული გამოვიდა „არისთან“ შეხვედრაში 3:2. შენგელიამ წინა ტურში გოლი გაიტანა, ამჯერად კი 2 საგოლე პასი მიითვალა და საუკეთესო შეფასებაც დაიმსაუხრა – 7.9. დამატებულ დროში შეცვალეს.

ლა ლიგა 2-ში გიორგი წიტაიშვილის „გრანადა“ სტუმრად 2:2 ეთამაშა „ელჩეს“. ჩვენიანს პირველი შედეგიანი მოქმედება აქვს – საგოლე პასი, რომლის შემდეგაც “გრანადა” დაწინაურდა. გიორგიმ 78-ე წუთამდე ითამაშა და Sofascore.com-ის მიხედვით საუკეთესო იყო ორივე გუნდში – 7.9, ხოლო Flashscore.com-ის ვერსიით – თავის გუნდში – 7.6.

კვიპროსზე, გიორგიმ გიორგიმ დაამწუხრა. გიორგი ქვილითაიას „არისმა“ სტუმრად 3:0 მოუგო გიორგი ლორიას „არადიპუს“. 63-ე წუთზე ქვილითაიამ 11-მეტრიანი გაუტანა ლორიას, რომელსაც 4 სეივი ჰქონდა. ქვილითაია 72-ე წუთზე გავიდა.

პოლონეთში, ოთარ კაკაბაძის „კრაკოვიამ“ 2:1 მოუგო „პოგონს“. კაკაბაძემ შეუცვლელად ითამაშა და პირველი გოლის ეპიზოდში შედეგიანი გადაცემა შეასრულა (პირველი სეზონში). შეფასება – 7.1.

დანიაში, გიორგი გოჩოლეიშვილის „კოპენჰაგენი“ სტუმრად 1:2 დამარცხდა „მიდტიულანდთან“. ქართველი ძირითადში იყო და 83-ე წუთზე შეცვალეს. მისი შეფასებაა 6.1.

სლოვაკეთში, გურამ კაშიას „სლოვანმა“ გასვლაზე 2:1 აჯობა „დუნაისკა სტრედას“. სამწუხაროდ, საქართველოს ნაკრების კაპიტანმა მეორე ტაიმის დასაწყისში საკუთარ კარში ჩაჭრა ბურთი.
კაშიამ შეუცვლელად ითამაშა და ყვითელი ბარათიც მიიღო. შეფასება – 6.5.

რუსეთში ლუკა გაგნიძის მოსკოვის „დინამომ“ 4:2 დაამარცხა „ახმატი“. საქართველოს ახალგაზრდული ნაკრების ფეხბურთელი მხოლოდ მეხუთე დამატებულ წუთზე შეუშვეს, თუმცა მოასწრო და მალევე გაიტანა, რითაც საბოლოო ანგარიში დააფიქსირა. ამ სეზონში ლუკამ მეორედ გამოიჩინა თავი.