დილა ქართველების აპოელ-ს შეხვდება: გორი უკვე თბილისში ითამაშებს

გორის „დილა“ ძალიან გვახარებს. სამი ქართული გუნდის გავარდნის შემდეგ, გორელები წინ მიიწევენ, ორი ძლიერი მეტოქე დაამარცხეს და კონფერენს ლიგის მესამე ეტაპზე გავიდნენ, სადაც ქართველების გუნდს შეხვდებიან – კვიპროსის აპოელ-ს. ეს გუნდი ხელწამოსაკრავი ნამდვილად არ არის, რაზეც ისიც მეტყველებს, რომ თავად აპოელ-მა სოლიდური სერბული გუნდი გამოთიშა ასპარეზობას.
კვიპროსულმა გუნდმა ნოვი სადის „ვოივოდინას“ ორივე მატჩი მოუგო და ორივე ერთნაირი ანგარიშთ 2:1. ჯერ შინ, ახლა კი სტუმრადაც.

შეგახსენებთ, პირველ შეხვედრაში ორივე გოლი ჩვენებმა გაიტანეს – გიორგი ქვილითაიამ და ლაშა დვალმა. განმეორებით მატჩში ქვილითაია კაპიტანი იყო და 84-ე წუთზე შეცვალეს, დვალმა კი სრულად ითამაშა.

აღსანიშნავია, რომ „დილა“ საშინაო მატჩს უკვე თბილისში გამართავს, „დინამო არენაზე“. ეს შეხვედრა 10 აგვისტოს გაიმართება, განმეორებითი თამაში კი ნიქოზიაში 17 აგვისტოს შედგება.