გამიკვირდა პსჟ: პარიზელები კუთხეში მოამწყვდიეს, მილანი საუკეთესო იყო

ჩემპიონთა ლიგა დაბრუნდა და თან როგორი სუპერდუელით. ტურნირის ორი ფავორიტი ერთმანეთს დაეჯახა. ლიგის მოგების დაუშრეტელი წყურვილით სავსე პსჟ გამოცდილ „ბაიერნს“ პირველ მატჩში შინ დაეჭიდა და არაფერიც არ გამოუვიდა – 0:1.

ერთადერთი გოლი 53-ე წუთზე ყოფილი გუნდის კარში კინგსლი კომანმა გაიტანა ალფონსო დევისის პასით.

პირველ ტაიმში პსჟ-ს ერთი დარტყმაც არ ჰქონია, რაც პირველად მოხდა 2016 წლის შემდეგ. პირველ ტაიმში გერმანელებს დარტყმებში 9:1 ჰქონდათ უპირატესობა.

მასპინძლების რიგებში 57-ე წუთზე შევიდა მოედანზე კილიან მბაპე და 82-ე წუთზე გოლი გაიტანა, რომელიც თამაშგარის გამო არ ჩათვალეს.

92-ე წუთზე ორი ყვითელი ბარათის გამო „ბაიერნის“ ფრანგი მცველი ბენჟამენ პავარი გააძევეს.

განმეორებითი შეხვედრა 8 მარტს მიუნხენში გაიმართება.

პსჟ – ბაიერნი 0:1
გოლი: 0:1 კომანი (53)

პსჟ: დონარუმა – ჰაკიმი (46. კიმპემბე), რამოსი, მარკინიოსი, მენდეში – ზაირ-ემერი (57. ფაბიან რუისი), პერეირა (75. ვიტინია), ვერატი, სოლერი (57. მბაპე) – მესი, ნეიმარი

ბაიერნი: ზომერი – პავარი, დე ლიხტი, უპამეკანო – სანე (90. სტანიშიჩი), კიმიხი, გორეტცკა, კანსელო (46. ა. დევისი) – მუსიალა (87. გრავენბერხი), კომანი (76. გნაბრი) – შუპო-მოტინგი (76. მიულერი)
გაძევება: პავარი (90+2. ბაიერნი)

„ბაიერნი“ ზედიზედ 20 მატჩია არ აგებს – 16 მოგება და 4 ფრე.

„ბაიერნმა“ წლევანდელ ჩემპიონთა ლიგაზე შვიდიდან შვიდი მატჩი მოიგო ბურთების შეფარდებით – 19:2.

პსჟ-მ ზედიზედ მესამე მატჩი წააგო, რაც პირველად მოხდა 2020 წლის შემდეგ.

პსჟ-ს ნახევარმცველი უორენ ზაირ-ემერი ჩემპიონთა ლიგის ისტორიაში ყველაზე ახალგაზრდა ფეხბურთელი (16 წლისა და 343 დღის) გახდა, ვინც ამ ტურნირის მატჩის ძირითად შემადგენლობაში მოხვდა.

მესის არცერთი შედეგიანი მოქმედება არ აქვს ლიგის პლეი-ოფის 3 მატჩში პსჟ-ს რიგებში.

მესიმ და ნეიმარმა 10 ბალიდან 4 მიიღეს. ამაზე ნაკლები არცერთს არ აქვს.

ნაგელსმანი: „გამიკვირდა პსჟ ასეთი პასიური რომ იყო. საერთოდ არ აპირებდნენ ბურთის წართმევას“.

გალტიე: „ბაიერნმა“ დაიმსახურა გოლი კარგი 60 წუთისთვის. შემდეგი 25 წუთი პსჟ ჯობდა. პირველ ტაიმში კუთხეში მოგვიმწყვდიეს. მბაპეს გამოსვლის შემდეგ კი გადავეწყვეთ და მეტოქეზე ზეწოლა განვახორციელეთ“.

კილიან მბაპე: „პსჟ-მ ბოლოსკენ დაინახა, რომ შეუძლია „ბაიერნს“ პრობლემები შეუქმნას. ქამბექის შესაძლებლობა არის, მთავარია ყველა ჯანმრთელად იყოს“.

9 წლის შემდეგ ჩემპიონთა ლიგის პლეი ოფში დაბრუნდა „მილანი“ და 1/8 ფინალის პირველ მატჩში შინ 1:0 მოუგო „ტოტენჰემს“.

ერთადერთი გოლი მე-7 წუთზე ნახევარმცველმა ბრაიმ დიასმა გაიტანა.

განმეორებითი შეხვედრა ლონდონში 8 მარტს გაიმართება.

მილანი – ტოტენჰემი 1:0
გოლი: 1:0 დიასი (7)

მილანი: ტატარუშანუ – კალულუ, კაიერი, ტიავი – სელემეკერსი (77. მესიაში), კრუნიჩი, ტონალი (86. პობეგა), ერნანდესი – დიასი (77. დე კეტელერი), ლეაო (90+1. რებიჩი) – ჟირუ

ტოტენჰემი: ფოსტერი – ლენგლე (81. ბ. დევისი), დაიერი, რომერო – ემერსონ როიალი, სკიპი, სარი, პერიშიჩი – კულუშევსკი (70. რიჩარლისონი), სონი (81. დანჯუმა) – კეინი
“მილანმა” ისტორიაში “ტოტენჰემს” პირველად მოუგო. აქამდე იყო 2 ფრე და 4 წაგება.

პიოლი: „საუკეთესო მატჩი ჩემპიონთა ლიგაზე ჩემს კარიერაში. სამწუხაროა, რომ „მილანმა“ მეორე გოლი ვერ გაიტანა“.