ვიდეო: ჰაალანდმა ფანს მთელი წუთი დაუთმო – ჩაეხუტა, მაისური აჩუქა, სელფი გადაიღო და ბოლოს იცეკვა კიდეც

ერლინგ ჰაალანდის დუბლი დორტმუნდის „ბორუსიას“ „მაინცის“ დამარცხებაში დაეხმარა (3:1). ნორვეგიელმა გოლები 54-ე და 94-ე წუთებზე (პენალტით) გაიტანა.

თამაშის დასრულებისას „ბორუსიელები“ ფანების ტრიბუნისკენ გაემართნენ, რათა ტრადიციულად გულემატკივრებს მისალმებოდნენ. მოედანზე კი ერთი ფანი შეიჭრა, თუმცა ის არ გაუგდიათ, პირიქით – ჰაალანდი ძალიან თავაზიანი აღმოჩნდა.

ფეხბურთელი ჩაეხუტა ქომაგს, აჩუქა მაისური, გადაიღო სელფი და მერე მასთან ერთად ტრიბუნის წინაშე იცეკვა. ამის შემდეგ ჰაალანდმა მას გასვლა თხოვა, მაგრამ მადააღძრულ ფანს ეს არ ეყო – ის სხვა ფეხბურთელებთან გაიქცა.

ბუნდესლიგის 6 მატჩში 21 წლის ჰაალანდს 9+3 შედეგი აქვს.