ბარსაში ძველი ახალი ეპოქა იწყება: ლაპორტა პრეზიდენტია

გუშინ ლეგენდარულ “კამპ ნოუზე” საფეხბურთო კლუბ “ბარსელონას” პრეზიდენტის არჩევნები ჩატარდა. არჩევნებში სამი კანდიდატი იღებდა მონაწილეობას – ჟოან ლაპორტა, ვიქტორ ფონტი და ანტონი ფრეიშა. ლაპორტამ ხმების 54.28 % მოაგროვა და “ბლაუგრანას” პრეზიდენტი მეორედ გახდა.

ლაპორტა კლუბს 2026 წლამდე უხელმძღვანელებს.

წინასაარჩევნო პერიოდში ლაპორტას მთავარი დაპირება იყო, რომ ლიონელ მესი “ბარსელონასთან” ახალ კონტრაქტს გააფორმებდა და კლუბში დარჩებოდა. არგენტინელს კატალონიელებთან კონტრაქტი 2021 წლის ზაფხულში ეწურება.

ჟოან ლაპორტა “ბარსელონას” პრეზიდენტი 2003-2010 წლებშიც იყო და ამ პერიოდში “ბარსამ” ოთხჯერ ლა ლიგა, ერთხელ ესპანეთის თასი, სამჯერ ესპანეთის სუპერთასი, ორჯერ ჩემპიონთა ლიგა და თითო-თითოჯერ უეფას სუპერთასი და მსოფლიოს საკლუბო ჩემპიონატი მოიგო.

შეგახსენებთ, ლაპორტამ ამ პოსტზე ხოსეპ მარია ბარტომეუ შეცვალა, რომელიც ე.წ. “ბოტების” სკანდალის გამო დააკავეს.

ბოტების სკანდალი დადასტურდა: ბარსელონას ყოფილი პრეზიდენტი დააკავეს