ხვიჩა პარიზს შეუთანხმდა: 5 წელი და 5-ჯერ მეტი ხელფასი – ეს რა კაცს ვკარგავთ

ხვიჩა კვარაცხელიას პარიზში გადასვლა , როგორც ჩანს, წუთების ამბავია და ჩვენიანის იტალიური თავგადასავალი დასასრულს მიუახლოვდა.

ყველაფრის წინასწარ მცოდნე იტალიელი ჟურნალისტი ფაბრიციო რომანო ამბობს, რომ პსჟ-სთან კონტრაქტის ყველა დეტალი შეთანხმებულია. ქართველი ფეხბურთელი მთავარ ფრანგულ კლუბთან 5-წლიან კონტრაქტს გააფორმებს და დაახლოებით 4-5-ჯერ მეტ ანაზღაურებას მიიღებს.
ჟურნალისტი ჯოვანი სკოტო წერს, რომ ხელფასი სეზონში 8 მილიონი პლუს ბონუსები იქნება.
სატრანსფერო ექსპერტის, ნიკოლო სკირას ცნობით კი, ხელშეკრულება 4+1 სისტემის იქნება და ხელფასი 9+2 მილიონი.

პარალელურად, მიმდინარეობს მოლაპარაკება „ნაპოლისა” და პსჟ-ს შორის. ახალი შეხვედრა მომავალ კვირას დაიგეგმა, რათა ტრანსფერი საბოლოოდ დაიხუროს.

სკოტო წერს, რომ „ნაპოლის“ პრეზიდენტმა, აურელიო დე ლაურენტისმა 100 მილიონი ევრო მოითხოვა, მაგრამ საბოლოოდ 80 მილიონ ევროზე დათანხმდება.

„ნაპოლის“ მთავარმა მწვრთნელმა, ანტონიო კონტემ „ვერონასთან“ მატჩამდე პრესკონფერენციაზე დაადასტურა, რომ კვარაცხელიამ წასვლა ითხოვა.

„გასულ ზაფხულს პრეზიდენტს ვთხოვე, ზუსტად მცოდნოდა, ვინ რჩებოდა გუნდში. მოვითხოვე რამდენიმე ფეხბურთელის დატოვება, რომელთა შორის, რა თქმა უნდა, კვარაცხელიაც იყო.
ხვიჩამ ჯერ კიდევ გასულ ზაფხულს ითხოვა გაყიდვა და ახლაც იგივე სურვილი გამოთქვა. პირადად ვესაუბრე და დამიდასტურა, რომ წასვლა სურს. ძალიან იმედგაცრუებული ვარ. 6 თვის განმავლობაში ვცდილობდი მისი გადარწმუნებას და ახლა მივხვდი, რომ ეს მეხის გასროლაა მოწმენდილ ცაზე. ძალიან მნიშვნელოვან მოთამაშეს ვკარგავთ“.

ხვიჩა კვარაცხელია „ნაპოლიში“ 2022 წელს მივიდა და პირველსავე საჩემპიონო სეზონში ფურორი მოახდინა.სულ კი 107 მატჩი, 30 გოლი და 24 საგოლე პასი მოუგროვდა.