12 კაცი ცნობილია: დღეს საქართველო უკრაინასთან მსოფლიოს იწყებს

საქართველოს ეროვნული ნაკრები მსოფლიოს 2027 წლის ჩემპიონატის საკვალიფიკაციო ტურნირს იწყებს. ერთკვირიანი შეკრება დასრულებულია – ალეკსანდარ ჯიკიჩმა ნაკრების კანდიდატები თბილისი არენაზე ავარჯიშა და დღეს, ღია ვარჯიშის შემდეგ ის 12-კაციანი შემადგენლობა დაასახელა, რომლითაც საქართველოს ნაკრები უკრაინასთან სათამაშოდ გავა.

შეკრებაზე არ ყოფილა თორნიკე შენგელია, რომელიც დღეს ევროლიგაში თამაშს ატარებს. მისი ბარსელონა ფრანგულ ვილერბანს მასპინძლობს და ეს მატჩი რომ დარულდება, საქართველოში უკვე 27 ნოემბერი, უკრაინასთან მატჩის დღე იქნება დამდგარი. შენგელია ჯიკიჩი მიერ დასახელებულ 12-კაციან განაცხადშია – ის ხვალ, გამთენიისას მოემგზავრება ბარსელონადან და თბილისში დღის 4 საათზე იქნება. თორნიკე ნაკრებს სასტუმროში შეუერთდება და 20:50 საათიდან თანაგუნდელებთან ერთად უკრაინის დასამარცხებლად იბრძოლებს.

ნაკრები 12-კაციანი შემადგენლობა ასე გამოიყურება: რატი ანდრონიკაშვილი, კახა ჯინჭარაძე, ბექა ბურჯანაძე, გიორგი შერმადინი, დუდა სანაძე, გიორგი ტურძილაძე, გიორგი კორსანტია, ალექსანდრე ფევაძე, თორნიკე შენგელია, თად მაკფადენი, ლუკა მაზიაშვილი და მათე ხატიაშვილი. მაზიაშვილი, ტურძილაძე, ხატიაშვილი და ნატურალიზებული ამერიკელი უკანახაზელი, თად მაკფადენი ძირითად ნაკრებში დაბრუნდნენ – დანარჩენი ყველა ეროვნულ ნაკრებში გასულ ევრობასკეტზე იყვნენ. 17 წლის მათე ხატიაშვილმა ნაკრებში ერთადერთხელ, ევრობასკეტ 2024-ის საკვალიფიკაციო ტურნირის ბოლო მატჩი, სერბეთთან ითამაშა.

ეს შეხვედრა ქართველი გულშემატკივრების წინაშე ბოლო იქნება გიორგი შერმადინისთვის, რომელიც თითქმის 20-წლიან სანაკრებო კარიერას ასრულებს. ნაკრები მისი ბოლო მატჩი კი 30 ნოემბერს, ესპანეთში შედგება. შესარჩევი ტურნირის პირველი ფანჯრის მეორე მატჩი საქართველო ტენერიფეში ესპანეთს დაუპირისპირდება.

საქართველოსა და უკრაინის მატჩი თბილისი არენაზე 20:50 საათზე დაიწყება.