ხვალ საღამოს მესხზე: ახალგაზრდულის სპარინგი უფასოა, მაგრამ ბილეთი მაინც საჭიროა

საქართველოს ახალგაზრდულ ნაკრებს ისტორიული პერიოდი უწევს. ჩვენი 21 წლამდელები პირველად ითამაშებენ კონტინენტის პირველობაზე, თან საშინაო კედლებში, თან კარგი გუნდით და მოლოდინიც შესაბამისად დიდია.

ტურნირის დაწყებამდე საქართველო ერთ ამხანაგურ მატჩ ს გამართავს. ადრევე ითქვა კვიპროსთან სპარინგის შესახებ, თუმცა ახლა დაზუსტდა დრო და ადგილი – 15 ივნისი, „მიხეილ მესხი არენა“, 20:00 სთ.

თამაშზე დასწრება უფასოა, მაგრამ მატჩზე დასასწრებად ბილეთების აღება მაინც საჭიროა. ბილეთები სტადიონის სალაროებში იქნება, რომელიც მატჩის დღეს 16:00 საათიდან იმუშავებს. სტადიონის კარი მატჩამდე 2 საათით ადრე, 18:00 საათზე გაიხსნება.

საქართველოს ახალგაზრდული ნაკრები, ევრო 2023-ის ჯგუფურ ეტაპს 21 ივნისს „დინამო არენაზე“ პორტუგალიასთან მატჩით გახსნის.

U21 | მატჩების განრიგი

21 ივნისი | საქართველო – პორტუგალია | 20:00
24 ივნისი | საქართველო – ბელგია | 20:00
27 ივნისი | საქართველო – ნიდერლანდები | 20:00

უეფა-ს 21-წლამდე ევროპის ჩემპიონატი საქართველოსა და რუმინეთში 21 ივნისიდან 8 ივლისის ჩათვლით გაიმართება. თამაშები საქართველოს სამ ქალაქში – თბილისში, ქუთაისსა და ბათუმში ჩატარდება. ევროპის ჩემპიონატის ფინალურ შეხვედრას 8 ივლისს „ბათუმი არენა“ უმასპინძლებს.