ჩაკვეტაძე არ უნდა გაიყიდოს, მაგრამ გამიკვირდება, კარიერას უფრო მაღალ დონეზე თუ არ გააგრძელებს

„უოტფორდის“ გულშემატკივრებმა კლუბის ხელმძღვანელობას მოუწოდეს, ჩაკვეტაძის ტრანსფერზე „ევერტონს“, „ვულვზსა“ და „ლესტერს“ უარი უთხრან – ქართველი ლეგიონერის შესაძლო წასვლაზე ფანების დამოკიდებულების შესახებ გამოცემა The72ClubNews-ი წერს:

„ფანები „უოტფორდის“ თავკაცებს მოუწოდებენ, არ გაუშვან გუნდიდან გიორგი ჩაკვეტაძე, რომლის თაობაზეც შეთავაზებები იანვრის სატრანსფერო ფანჯარის დროს იქნება.

გასულ სეზონში მე-15 ადგილზე გასვლის შემდეგ ვარაუდობდნენ, რომ ტომ კლევერლის გუნდი წელს სატურნირო ცხრილის შუაში ან ქვედა საფეხურზე იქნებოდა. თუმცა ჩემპიონატის ნახევარი მიილია, „უოტფორდი“ კი მერვე ადგილზეა და მხოლოდ ორი ქულით ჩამორჩება მეექვსეადგილოსან „მიდლსბროს“ – სწორედ მასთან უნდა გამართოს გუნდმა გამოტოვებული შეხვედრა.

გუნდს პლეი ოფში მოხვედრის შანსი რომ აქვს, ამაში ჩაკვეტაძის დამსახურებაც არის. 25 წლის ფეხბურთელმა ამ სეზონში თავი გამოიჩინა და დაამტკიცა, რომ ინგლისის ჩემპიონშიფში ერთ-ერთი საუკეთესო გამთამაშებელია. მიუხედავად იმისა, რომ 21 მატჩში მხოლოდ ერთი გოლი და ოთხი საგოლე გადაცემა აქვს, სხვადასხვა სტატისტიკური მახასიათებლებით გიორგი ჩემპიონშიფის ყველაზე შემოქმედებით მოთამაშეებს შორისაა.

მათთვის, ვისაც ამ სეზონში ნიჭიერი ნახევარმცველის თამაში უნახავს, გასაკვირი არ უნდა იყოს, რომ მსურველები ინგლისის პრემიერლიგაშიც გამოუჩნდა – როგორც Football League World-მა ექსკლუზიურად გასულ კვირას გაამხილა, პრემიერლიგის „ევერტონი“ და „ლესტერი“ ჩაკვეტაძის თამაშს ყურადღებით აკვირდებიან. ამავდროულად, The Sun-ის ინფორმაციით, ქართველით „ვულვერჰემპტონიც“ აღფრთოვანებულია.

ფეხბურთელმა „უოტფორდთან“ ახალ, ხუთწლიან კონტრაქტს სექტემბერში მოაწერა ხელი. კლუბი მის ტრანსფერში 20 მილიონი გირვანქა სტერლინგს ითხოვს – მოსალოდნელია, რომ უახლოეს პერიოდში ჩაკვეტაძისთვის ბრძოლას კიდევ არაერთი კლუბი შეუერთდება, რაც გულშემატკივრებს აშფოთებთ.

„უოტფორდის“ ფანების ლიდერის, ჯასტინ ბიტის თქმით, ჩაკვეტაძე კლუბისთვის ფასდაუდებელი მოთამაშეა, რომელიც სულ მცირე სეზონის ბოლომდე არანაირ ფასად არ უნდა გაიყიდოს: „ძალიან მნიშვნელოვანია, რომ ჩაკვეტაძემ გუნდი არ დატოვოს. ქართველმა ამ სეზონში დაამტკიცა, რომ უმნიშვნელოვანესი ფეხბურთელია. ვფიქრობ, მისთვის „ჭერი“ არ არსებობს და ძალიან გამიკვირდება, თუ კარიერას უფრო მაღალ დონეზე არ გააგრძელებს“.

1tv.ge