ქოჩორაშვილი შეეცდება სპორტინგში სულ სხვა ისტორია დაწეროს 

„ქოჩორაშვილი შეეცდება, „სპორტინგში“ სულ სხვა ისტორია დაწეროს“, – ამ სათაურით აქვეყნებს ცნობილი პორტუგალიური გამოცემა Abola წერილს, რომელიც „ლევანტეს“ ქართველი ლეგიონერის პორტუგალიურ გრანდში გადასვლის პერსპექტივას ეხება.

„ორშაბათ საღამოს „სპორტინგმა“ ოფიციალურად გამოაცხადა ესპანური „ლევანტედან“ ქართველი ნახევარმცველის, გიორგი ქოჩორაშვილის ტრანსფერი. თანხა 5,5 მილიონი ევროა, რომელსაც შეიძლება დაემატოს 2 მილიონი ევრო, თუ ქართველი ფეხბურთელი ინდივიდუალურ და გუნდურ წარმატებებს მიაღწევს.

საქართველო არ არის გრანდი ევროპულ ფეხბურთში, რომ აღარაფერი ვთქვათ მსოფლიო ფეხბურთში, მაგრამ ამ ქვეყნის ეროვნულმა ნაკრებმა ბოლო ევროპის ჩემპიონატზე ითამაშა, სადაც ჯგუფში მიქაუტაძისა და კვარაცხელიას გოლებით პორტუგალია დაამარცხა 2:0, ქოჩორაშვილი კი მოედანზე 90 წუთი იყო.

მკითხველს გაუჭირდება გაიხსენოს, იყო თუ არა „ლომების“ საუკუნოვან ისტორიაში ერთი მოთამაშე მაინც ამ ქვეყნიდან. ამაში ჩვენ დაგეხმარებით – უკვე ყოფილა. მეკარე პაპუნა ბერუაშვილი, რომელიც 2022/2023 წლების სეზონში „ლომებმა“ „დინამო თბილისიდან“ იჯარით დაიმატეს. მეკარემ, რომელიც მაშინ 18 წლის იყო, მხოლოდ 5 მატჩში ითამაშა 23-წლამდელთა გუნდში და დაბრუნდა მშობლიურ „დინამოში“, სადაც ახლა სარეზერვო გუნდის სამსახურშია.

ქოჩორაშვილი მომავალი სეზონის დასაწყისში მოვა „სპორტინგში“ და შეეცდება, დაწეროს სულ სხვა ისტორია, გამარჯვების ისტორია“, – წერს პორტუგალიური გამოცემა.

1tv.ge