სტივენ ჯერარდს ფულემთან მარცხი აღარ აპატიეს, ლესტერის მორიგი გამარჯვება!

გუშინ, პრემიერ ლიგის შუა ტური დასრულდა და დასკვნით აკორდად ცხრილის ქვედა ნაწილში მყოფი გუნდების შეხვედრები გვქონდა.

“ფულემმა” “ქრეივენ ქოთიჯზე” სტივენ ჯერარდის “ასტონ ვილას” უმასპინძლა და მეტოქე 3:0 გაანადგურა.

ამ შეხვედრის დასრულებიდან მალევე “ასტონ ვილას” ოფიციალურმა გვერდებმა სტივენ ჯერარდის წასვლის შესახებ ცნობა გამოაქვეყნეს. ბოლო პერიოდში, ისედაც მორყეულ ჯერარდის სკამს უკანასკნელი ჭანჭიკიც გამოეცალა და 11 თვიანი კარიერა ასე დასრულდა.

“ასტონ ვილა” 9 ქულით მე-17 საფეხურზეა, ხოლო მარკო სილვას “ფულემი” 15 ქულით მე-9 საფეხურზეა.

კიდევ ერთი ისეთი მატჩი, რომელშიც ორივე გუნდის მესაჭეს სკამი შერყეული ჰქონდა “ქინგ ფაუერზე” “ლესტერსა” და “ლიდსს” შორის გაიმართა.

კოხის ავტოგოლითა და ჰარვი ბარნსის გოლით “ლესტერმა” მეტოქე 2:0 დაამარცხა და ბოლო საფეხურს თავი დააღწია. როჯერსის გუნდი მე-19 საფეხურზეა.