პირველი ფეხბურთელი 100 მოგებით: 906 გოლი კარიერაში და 133 გოლი ნაკრებში – აცალეთ კაცს სელფის გადაღება

კრიშტიანო რონალდოს პორტუგალიის ნაკრების ოფიციალურ მატჩებში 100 მოგება აქვს.

პორტუგალიამ ერთა ლიგის ჯგუფური ეტაპის მესამე ტურში პოლონეთის ნაკრები 3:1 დაამარცხა. რონალდომ გოლი გაიტანა.

კრიშტიანო გახდა ისტორიაში პირველი ფეხბურთელი, რომელმაც ეროვნული ნაკრების ოფიციალურ მატჩებში 100 გამარჯვება მოიპოვა.

გარდა ამისა, მან გაიმეორა სერხიო რამოსის რეკორდი გამარჯვებების რაოდენობით, მათ შორის ამხანაგურ მატჩებში – 131.

–

რონალდომ კარიერაში 906-ე გოლი გაიტანა.
39 წლის ფეხბურთელმა კარის ხაზიდან ბურთი ცარიელ ბადეში მას შემდეგ გაგზავნა, რაც რაფაელ ლეაომ ძელს მოარტყა.
მიმდინარე სეზონში რონალდომ 12 მატჩი ჩაატარა ყველა ტურნირზე და 11 გოლი გაიტანა.

–

რონალდომ ეროვნული ნაკრების ბომბარდირთა სიაში ლიდერობა გაიმყარა.
ეს კრიშტიანოს 133-ე გოლია ეროვნულ ნაკრებში. ამ მაჩვენებლით ის პირველ ადგილზეა, მას მოსდევს ლიონელ მესი – 109 გოლი არგენტინის ნაკრებში.

–

კრიშტიანომ უარი არ თქვა მოედანზე შევარდნილ ფანთან ფოტოს გადაღებაზე.
63-ე წუთზე შეცვლის დროს პორტუგალიელს მობილური ტელეფონით ახალგაზრდა მიადგა, რომელსაც სწორედ კუმირის მაისური ეცვა.
რონალდომ სთხოვა სტიუარდს, რომელიც გულშემატკივარს მიჰყვებოდა, სელფის გადაღების ნება დართო.