მიქაუტაძემ გაიტანა, ლიონმა მოიგო და ახლა… ხვიჩას და პსჟ-ს ელოდებიან

ლიგა 1-ის 22-ე ტურში „ლიონი“ სტუმრად აუტსაიდერ „მონპელიეს“ შეხვდა და განსაკუთრებული პრობლემების გარეშე მოუგო – 4:1.

გიორგი მიქაუტაძე ძირითადში იყო და სასიხარულოა, რომ ანგარიში მალევე სწორედ მან გახსნა. მე-3 წუთზე ბურთი საჯარიმოში ზურგით მდგომმა მიიღო, მოტრიალდა, მეურვე კორპუსით დაფარა და შორეულ დაბალ კუთხეში ზუსტად დაარტყა.

მიქაუტაძე 70-ე წუთზე ალეკსანდრ ლაკაზეტმა შეცვალა.

გიორგის თამაში ანალიტიკურმა საიტებმა ასე შეაფასეს: whoscored – 7.3, flashscore – 7.2, sofascore – 7.0.

მიქაუტაძემ ზედიზედ მეორე შეხვედრაში გაიტანა, სულ კი მის ანგარიშზე ამ სეზონში ყველა ტურნირზე 30 მატჩში 10 გოლი და 2 საგოლე პასია. აქედან ლიგა 1-ში 6 გოლია.