მევალეები ფეხების მოტეხვით მემუქრებოდნენ: ტონალი თავისი გუნდის თამაშებზე დებდა ფსონებს

„ნიუკასლ იუნაიტედის“ ნახევარმცველს სანდრო ტონალის, შესაძლოა, ერთწლიანი დისკვალიფიკაცია მისცენ ტოტალიზატორზე თამაშის გამო.

იტალიის ნაკრების 23 წლის ფეხბურთელი ფიგურანტია არალეგალურ პლატფორმებზე ფსონების საქმეში. ტურინის პროკურატურას ტონალი სამი საათის განმავლობაში ჰყავდა დაკითხვაზე.

ფეხბურთელმა აღიარა, რომ ფსონებს ჩადიოდა საფეხბურთო მატჩებზე. უფრო მეტიც, ის ტოტალიზატორში თამაშობდა „მილანის“ მატჩებზე, ოღონდ იმ შეხვედრებში, რომლებშიც თავად არ მონაწილეობდა. შესაბამისად, მას არ შეეძლო პირდაპირი გავლენა მოეხდინა თამაშების შედეგებზე.

ტონალის, რომელიც 2023 წლის ზაფხულში „მილანიდან“ „ნიუკასლში“ გადავიდა, ამ აღიარებითი ჩვენებით სურდა „იუვენტუსის“ ნახევარმცველის ნიკოლო ფაჯოლის გზით წასულიყო და შვიდთვიანი დისკვალიფიკაცია მიეღო, მაგრამ მათ საქმეებში განსხვავებები არსებობს.

თუ ტონალის ფსონები „მილანის“ მატჩებზე დადასტურდება, ის ავტომატურად მიიღებს უფრო ხანგრძლივი ვადით დისკვალიფიკაციას – სამიდან ოთხ წლამდე. თუმცა, სასჯელი განახევრდება ბრალის აღიარების წყალობით.

ლაპარაკია 12-თვიან დისკვალიფიკაციაზე და კიდევ ექვსთვიან ალტერნატიულ სანქციებზე, რაც თამაშზე დამოკიდებულების საწინააღმდეგო მკურნალობაში გამოიხატება. ტონალიმ აღიარა, რომ თამაშზე დამოკიდებულია.

შემარბილებელი გარემოებები ძალაში შევა, თუ ტონალის ჩვენება დაემთხვევა იმ მონაცემებს, რომელიც მისგან ამოღებულ ტელეფონშია. თუ მნიშვნელოვანი განსხვავება იარსებებს, ტონალის სასჯელი შეიძლება კიდევ უფრო გამკაცრდეს.

„იუვენტუსის“ ფეხბურთელმა ნიკოლო ფაჯოლიმ ჟურნალისტებს მოუყვა იმის შესახებ, რომ არალეგალურ ბუკმეიკერთან „ნიუკასლის“ ნახევარმცველის სანდრო ტონალის რჩევით დარეგისტრირდა.

ეს 2021 წელს მოხდა, როცა ფაჯოლი და ტონალი იტალიის ახალგაზრდული ნაკრების შეკრებაზე იმყოფებოდნენ, – წერს გამოცემა Tuttosport.

„მე ვუყურებდი, როგორ აკეთებდა ფსონებს ტონალი. ვკითხე ამის შესახებ.

მან მითხრა, რომ მეც შემიძლია იგივეს კეთება. ის მარწმუნებდა, რომ არანაირ კვალს არ დატოვებდა და მაიძულა ჩემი ანგარიშის დარეგისტრირება არალეგალურ ბუკმეიკერთან. ჩემი პირველი ფსონები ჩოგბურთზე გავაკეთე, შემდეგ – ფეხბურთზე.

სხვა არალეგალურ პლატფორმებსაც ვიყენებდი, მაგრამ უკვე არ მახსოვს ყველას სახელი, რადგან ისინი ყოველ თვე იცვლებოდნენ.

ფსონების კეთება 2021 წლის ზაფხულში დავიწყე. არასოდეს მიკითხავს – ლეგალური თუ არალეგალური იყო ესა თუ ის პლატფორმა. განსხვავება იმაში იყო, რომ არალეგალურ პლატფორმებზე შემეძლო ფულის წინასწარი გადახდის გარეშე მეთამაშა. უბრალოდ დროის მოკვლა მინდოდა.

წლის განმავლობაში, ძირითადად, ჩოგბურთზე ვდებდი ფსონებს. 2022 წლის იანვარში უკვე დეპრესია მქონდა დაგროვებული ვალების გამო, იმავე წლის სექტემბრიდან კი დიდი თანხების დადება დავიწყე ფეხბურთზე“, – განაცხადა „იუვენტუსის“ ფეხბურთელმა დაკითხვაზე.

ფაჯოლი დამნაშავედ სცნეს საფეხბურთო მატჩებზე ფსონებში და 7-თვიანი დისკვალიფიკაციით დასაჯეს.

ნიკოლო ფაჯოლიმ იტალიის პროკურატურაში დაკითხვისას ილაპარაკა იმ ვალების შესახებ, რომელიც არალეგალური ფსონებისას დაუგროვდა.

„ძალიან დიდი ვალი დამიგროვდა. ერთ-ერთი არალეგალური ბუკმეიკერის ვალი მქონდა 110 ათასი ევროს ოდენობით, კიდევ 1.5 მილიონი – მეორის, 1,3 მილიონი – მესამის.

ჩემი ვალები იზრდებოდა და გადაუხდელობის შემთხვევაში, ფეხების მოტეხვით მემუქრებოდნენ.

ვფიქრობდი, რომ მხოლოდ იმის გამო ვთამაშობდი, რათა ვალები გამესტუმრებინა.

„იუვენტუსში“ ჩემმა პარტნიორებმა არაფერი იცოდნენ ჩემი ფსონების შესახებ. ერთხელ თანაგუნდელს 40 ათასი ევრო ვთხოვე – ვუთხარი, რომ საათის ყიდვა მინდოდა, დედამ კი ჩემი ანგარიში დაბლოკა.

რადუ დრეგუშინმა 2022 წლის ოქტომბერში მასესხა 40 ათასი ევრო. ამ ფულით მილანში Rolex-ის საათი შევიძინე, რათა ვალის ნაწილი დამეფარა.

ხანდახან არალეგალურ ბუკმეიკერებს თავად მოჰქონდათ საათები იუველირებისგან, ხანდახან მე მიმქონდა მათთვის“, – მოჰყავს „იუვენტუსის“ ფეხბურთელის სიტყვები გამოცემა La Gazzetta Dello Sport-ს.

1tv.ge