მანჩესტერს ხვიჩა სურს, ბარსელონაც საქმეშია

“მანჩესტერ იუნაიტედის” ახალ მთავარ მწვრთნელს, პორტუგალიელ რუბენ ამორიმს შემადგენლობის გადახალისება სურს. გუნდი მართლაც საჭიროებს ცვლილებებს, რადგან უკვე წლებია, ეს ბირთვი ბევრი ვერაფრით ახარებს ინგლისური გრანდის გულშემატკივრებს.

“სპორტმედიასეტის” ინფორმაციით, “მანჩესტერ იუნაიტედის” ერთ-ერთი მთავარი სამიზნე ხვიჩა კვარაცხელიაა. “იუნაიტედი” საქართველოს ნაკრების ერთ-ერთი ლიდერს 5-წლიან კონტრაქტს და წლიურ ანაზღაურებად 8 მილიონ ევროს შესთავაზებს. იტალიური წყაროს ინფორმაციით, ამას შეიძლება დაემატოს მილიონი ევრო ბონუსის სახით.

“პრემიერლიგაში ხვიჩა კვარაცხელიას სერიოზულად აკვირდებიან. “მანჩესტერ იუნაიტედი” ძალიან სერიოზულადაა განწყობილი. ახალი მთავარი მწვრთნელი, რუბენ ამორიმი, უპირატესობას 3-4-3 სქემას ანიჭებს.”იუნაიტედი” ახლა გამალებით ეძებს ახალ გარემარბს.

“იუნაიტედი” აცხადებს მზადყოფნას, 5-წლიანი კონტრაქტით მოხიბლოს ქართველი ფეხბურთელი. წლიური ხელფასის სახით უნდა განისაზღვროს 8 მილიონი ევრო და ამას დაემატოს ბონუსები. ეს წინადადება ერთგვარად ჰგავს იმ შეთავაზებას, რომელიც ხვიჩამ, მისი აგენტის თქმით, ამ ზაფხულს მიიღო “პარი სენ-ჟერმენისგან”. მაშინ ფრანგული გრანდი ქართველს წლიური ანაზღაურების სახით 10 მილიონ ევროს სთავაზობდა.

“ნაპოლის” დიდი სურვილი აქვს “კვარასთან” თანამშრომლობისა და კონტრაქტის გაგრძელების, მაგრამ ამ დროისთვის კლუბსა და მოთამაშეს შორის ახალი ხელშეკრულების თაობაზე არანაირი შეთანხმება არ არის მიღწეული. “პარტენოპეის” პრეზიდენტმა, აურელიო დე ლაურენტისმა, უკვე შესთავაზა კვარაცხელიას წლიური ხელფასის სახით 8 მილიონი ევრო და ეს ამ ეტაპზე “ნაპოლის” მაქსიმუმია. “მანჩესტერ იუნაიტედის” წინადადება კი, ბონუსსაც თუ ჩავთვლით, სამი მილიონით მეტს ითვალისწინებს”, – წერს იტალიური გამოცემა.

ამავე თემას ეხმაურება ინგლისური საინფორმაციო საშუალება Caught Offside. ამ გამოცემის ინფორმაციით, რუბენ ამორიმს ძალიან უნდა ქართველი ფეხბურთელის გადაბირება:

“როგორც იქნა, რუბენ ამორიმი ოფიციალურად გამოცხადდა “მანჩესტერ იუნაიტედის” მთავარ მწვრთნელად. ჩვენი ინფორმაციით, ამორიმი უკვე აკვირდება ერთ განსაკუთრებულ ტალანტს, რომელსაც შეუძლია, “გაანათოს” “ოლდ ტრაფორდი”.

მიუხედავად იმისა, რომ “ნაპოლი” ქართველი ფეხბურთელის სანაცვლოდ დაახლოებით 90 მილიონ ევროს მოითხოვს, ამორიმს ძალიან უნდა კვარაცხელიას გადაბირება. ხვიჩამ უნდა ჩაანაცვლოს ანტონი, ვისაც ვერანაირი სარგებლობა ვერ მოაქვს გუნდისთვის.

23 წლის კვარაცხელიამ დაიწყო მოლაპარაკება “ნაპოლისთან” კონტრაქტის გახანგრძლივების შესახებ, თუმცა ამ ეტაპზე ეს მოლაპარაკება ჩიხშია შესული. გასაგებია, რომ “ნაპოლის” არ სურს, დათანხმდეს ახალ კონტრაქტში დაბალი გამოსასყიდი თანხის ჩაწერას, რასაც ითხოვს ფეხბურთელის აგენტი. კვარაცხელია, ვინც ცნობილია თავისი შემტევი უნარების მრავალფეროვნებით, ასევე არის “არსენალისა” და “ლივერპულის” დაკვირვების ქვეშ.

გადაწყვეტილი ამბავია, რომ ნიდერლანდელი მთავარი მწვრთნელის, ერიკ ტენ ჰაგის წასვლის შემდეგ სხვა გუნდში გააგრძელებს კარიერას ბრაზილიელი ანტონი და მას კვალიფიციური შემცვლელი სჭირდება.

როგორც ცნობილი გახდა, “მანჩესტერ იუნაიტედის” სკაუტები მას დააკვირდნენ “კარლო კასტელანიზე” გამართულ მატჩში, რომელშიც “ნაპოლიმ” სტუმრად მინიმალური ანგარიშით, 1:0 დაამარცხა “ემპოლი”. ამასობაში, ქართველი ისევ რჩება “პარი სენ ჟერმენის” პოტენციურ სამიზნედ”, – წერენ ინგლისელები.

ამასობაში, ესპანურ მედიაში ძალიან ხშირად ჩნდება ცნობები იმის შესახებ, რომ კვარაცხელიას სამსახურით “ბარსელონაა” დაინტერესებული. ცხადია, ამ შემთხვევაში შესაძლოა პრობლემები შექმნას “ნაპოლის” მიერ მოთხოვნილმა დიდმა თანხამ. ბევრი რამ იმაზე იქნება დამოკიდებული, თუ როგორ პოზიციას დაიკავებს იტალიური კლუბის ხელმძღვანელობა.

გავრცელებული ინფორმაციით, “ბარსელონა” წინააღმდეგი არ იქნება, კვარაცხელიასთან დაკავშირებულ გარიგებაში ჩართოს ერთ დროს უნიჭიერესად შერაცხული ფრენკი დე იონგი, ვისაც “ბლაუგრანაში” საქმეები კარგად არ მიუდის.

ასევე წერენ იმის თაობაზე, რომ კვარაცხელიას თამაშით მოხიბლულები არიან “ბარსელონას” მთავარი მწვრთნელი, გერმანელი სპეციალისტი ჰანსი ფლიკი და ესპანური კლუბის სპორტული დირექტორი, ახლო წარსულში შესანიშნავი პორტუგალიელი ფეხბურთელი დეკუ სოუზა.

ასევე იწერება სხვა ცნობილი კლუბების ინტერესზეც. მოკლედ, უნდა დაველოდოთ. შესაძლოა, საქართველოს ნაკრების ლიდერმა კლუბი ზამთრის სატრანსფერო ფანჯრის დროსაც კი შეიცვალოს.

lelo.ge