ლოჩოშვილი სალერნიტანაში გადადის

„კრემონეზესთან“ ლუკა ლოჩოშვილთან დაკავშირებული ყველა დეტალი გარკვეულია და ქართველი ფეხბურთელი იტალიის სერია B-ს „სალერნიტანაში“ გადავა – ინფორმაციას salernitananews-ი ავრცელებს.

„ზამთრის სატრანსფერო „ფანჯარაში“ „სალერნიტანა“ ბაზარზე ძალიან გააქტიურდა. გუნდის სპორტული დირექტორი მარკო ვალენტინი კიდევ ერთ ტრანსფერს ასრულებს. ამ დროისთვის კლუბი „კრემონეზედან“ ლუკა ლოჩოშვილის გადაყვანაზე მუშაობს და გარიგების დეტალებს აზუსტებს.

საბოლოო დეტალები უცნობია, მაგრამ კონტრაქტზე წინასწარი შეთანხმება უკვე მიღწეულია. „კრემონეზეში“ ქართველმა მცველმა ამ სეზონში მხოლოდ 7 მატჩი ჩაატარა, „სალერნიტანაში“ კი ადგილის დამკვიდრებას შეეცდება“, – წერს salernitananews-ი.

ლუკა ლოჩოშვილი „კრემონეზეს“ რომ ტოვებდა, ეს ცნობილი იყო. თურქული მედიის მტკიცებით, ქართველ მცველს „გაზიანტეპი“ და „რიზესპორი“ იწვევდნენ. იყო იტალიის სერია B-ს ვარიანტიც – ლუკას „მოდენა“ ეპატიჟებოდა.

ლოჩოშვილმა, საბოლოოდ, ისევ იტალიაში დარჩენა ამჯობინა და გადადის „სალერნიტანაში“, რომელიც საგაზაფხულო ეტაპს 20-გუნდიან იტალიის სერია B-ში მე-18 ადგილზე, გასავარდნ ზონაში დაიწყებს.

1tv.ge