ლოჩოშვილის ნიურნბერგი დამარცხდა, კვერნაძემ კარგად ითამაშა, ქვილითაიამ გაიტანა – ლეგიონერები

მეორე ბუნდესლიგის მე-14 ტურში ლუკა ლოჩოშვილის „ნიურნბერგი“ სტუმრად „მაგდებურგთან“ დამარცხდა – 0:3.
ასე შეწყდა „ნიურნბერგის“ 6-მატჩიანი წაუგებელი სერია (4 მოგება და 2 ფრე).

ქართველმა მცველმა შეუცვლელად ითამაშა. შეფასებები: sofascore – 6.1, flashscore – 6.1, whoscored – 6.0.

მეორე ტაიმის დასაწყისში ორივე გუნდის გულშემატკივრებმა პიროტექნიკა გამოიყენეს და შეხვედრა 13 წუთით შეჩერდა.

მაგდებურგი – ნიურნბერგი 3:0
გოლები: 1:0 ჟუკოვსკი (73), 2:0 ჟუკოვსკი (90+5), 3:0 ბროინიგი (90+10)
გაძევება: ლიუბახი (76, ნიურნბერგი)

„ნიურნბერგი“ ამ მომენტისთვის 18 ქულით მე-9 ადგილზეა და 7 დეკემბერს „ფიურტს“ უმასპინძლებს.

იტალიის სერია A-ს მე-13 ტურში საბა გოგლიჩიძის „უდინეზემ“ სტუმრად „პარმას“ მოუგო – 2:0. ქართველი მცველი სათადარიგო იყო.

სერია B-ში გიორგი კვერნაძის „ფროზინონემ“ სტუმრად „რეჯიანა“ დაამარცხა – 1:0. ქართველი თავდამსხმელი ძირითადში იყო და 75-ე წუთზე შეცვალეს. მან ერთ-ერთი საუკეთესო შეფასება მიიღო – 7.3. „ფროზინონე“ მეორე ადგილზეა.

ნიდერლანდებში, ირაკლი იეგოიანის „ექსელსიორმა“ აუტსაიდერ „ბრედას“ უმასპინძლა და მოუგო – 1:0. ქართველი ნახევარმცველი ძირითადში იყო და სრულად ითამაშა.

გოლი გაიტანა გიორგი ქვილითაიამ, რომლის “არისმა” 4:0 მოიგო შინ “პარალიმნისთან”. 24-ე წუთზე ანგარიში ქართველმა თავდამსხმელმა გახსნა, ფლანგური პასის დროს მეკარეს დაასწრო, თავით გადაგზავნა ბურთი კარში და ჩემპიონატში მე-3 გოლი მიითვალა. შეცვალეს 77-ე წუთზე. საბოლოო ანგარიშია 4:0. მეტოქე გუნში ზურაბ მუსელიანი 61-ე წუთზე შეცვალეს.