კიტემ ტრავმა მიიღო და შეცვალეს

ძალიან, ძალიან ცუდი ამბავი, ზედ სანაკრებო მატჩების წინ, ჩვენი ერვონული გუნდის ერთ-ერთმა წამყვანმა ფეხბურთელმა ოთარ კიტეიშვილმა ტრავმა მიიღო. იმედი ვიქონიოთ, დაზიანება არ იქნება იმდენად სერიოზული, რომ შეუცვლელ ფეხბურთელს ორი უმნიშვნელოვანესი თამაშის გამოტოვება მოუწიოს.

ავსტრიის ჩემპიონატში „შტურმი“ დერბიში მუხრან ბაგრატიონის „გრაცერს“ ესტუმრა და აჯობა – 3:0 კიტეიშვილი დაშავდა და პირველი ტაიმის შემდეგ შეცვალეს.

ოთარმა ტაიმის მიწურულს, საკუთარი საჯარიმოს მისადგომებიდან დაწყებული რეიდის შემდეგ, მიიღო ტრავმა. ის შეწუხებული, კოჭლობით და სამკლაურმოხსნილი (რამდენიმე წუთით ადრე კაპიტანი გორენც სტანკოვიჩიც დაშავდა და სამკლაური კიტეიშვილმა გადაიბარა) გავიდა მოედნიდან.
როგორც გაირკვა, კიტეიშვილმა ბურთისთვის ბრძოლაში წვივი დაიზიანა.

ისე კი, კიტეიშვილი პირველ ტაიმში ერთ-ერთი გამორჩეული იყო და შეფასება 7.1 მიიღო.

„შტურმი“ 9 ქულით მე-3 ადგილზეა და 13 სექტემბერს ვენის „აუსტრიას“ უმასპინძლებს.

ჯერ უცნობია რამდენად სერიოზულად დაშავდა ქართველი ფეხბურთელი, მის მდგომარეობაზე ინფორმაციას გუნდის მწვრთნელი იურგენ ზოიმელიც მოუთმენლად ელოდება:

„კიტეიშვილის ტრავმა ძალიან მტკივნეულია, თუმცა საბოლოო დიაგნოზს დაველოდოთ. ფაქტია, რომ ტრავმიანობის კრიტიკული ზღვარი უკვე გადავლახეთ და სასწრაფოდ გვჭირდება ტრანსფერი“, – განაცხადა „შტურმის“ მთავარმა მწვრთნელმა.