კვერნაძე ლიდერია, ბევრს არ უთამაშია – ლეგიონერები

ავსტრიის ჩემპიონატის მე-17 ტურში ოთარ კიტეიშვილის გრაცის „შტურმი“ ვენაში „აუსტრიას“ ესტუმრა და 1:3 დამარცხდა. ქართველი ნახევარმცველი ძირითად შემადგენლობაში იყო, შეუცვლელად ითამაშა და ყვითელი ბარათი მიიღო.
შეფასებები: sofascore – 6.3, flashscore – 5.8.

გიორგი კვერნაძის „ფროზინონე“ წარმატებულ სერიას განაგრძობს, „პესკარას“ ესტუმრა, 2:1 მოუგო და 34 ქულით სერია B-ს ერთპიროვნული ლიდერია. კვერნაძემ 74 წუთი ითამაშა. შეფასებები: sofascore – 6.2, flashscore – 5.8.

სლოვაკეთის ჩემპიონატში გურამ კაშიას „სლოვანმა“ სანდრო ნარიმანიძის „ჟილინა“ 3:2 დაამარცხა. კაშიამ სრულად ითამაშა, ნარიმანიძე კი სათადარიგო იყო.

მეორე ბუნდესლიგაში ლუკა ლოჩოშვილის „ნიურნბერგი“ გელზენკირხენში „შალკეს“ ესტუმრა და დამარცხდა – 0:1. ქართველმა მცველმა შეუცვლელად ითამაშა და პირველი ტაიმის ბოლოს ყვითელი ბარათი მიიღო. შეფასებები: whoscored – 6.5, sofascore – 6.4, flashscore – 6.2.

ბუნდესლიგაში გიორგი გოჩოლეიშვილის „ჰამბურგი“ ერთ-ერთ ლიდერს, „ჰოფენჰაიმს“ ესტუმრა და დამარცხდა – 1:4. ქართველი მცველი ძირითად შემადგენლობაში იყო, მაგრამ უკვე შესვენებაზე შეცვალეს.

„ზანკტ-პაულიმ“ ბუდუ ზივზივაძის „ჰაიდენჰაიმს“ 2:1 მოუგო. ქართველი თავდამსხმელი მუხლის ტრავმის გამო 22 ნოემბრის შემდეგ არ თამაშობს.

სერია A-ში საბა გოგლიჩიძის „უდინეზემ“ შინ „ნაპოლის“ 1:0 მოოუგო. ჩვენიანმა 29 ოქტომბრის შემდეგ პირველად ითამაშა, ოღონდ სულ ცოტა ხნით, 90+4-ე წუთზე შეცვლაზე შევიდა.

გიორგი გულიაშვილის „სარაევომ“ ბოსნიის ჩემპიონატში მოქმედი ჩემპიონი „ზრინსკი“ სტუმრად 1:0 დაამარცხა და 29 ქულით მე-3 ადგილზეა. გულიაშვილმა სრულად ითამაშა.

პორტუგალიაში ერთმანეთს ქართველების გუნდები დაუპირისპირდნენ – ოთარ მამაგეიშვილის „ფამალიკაომ“ ნოდარ ლომინაძის „ეშტორილი“ მიიღო და დიდი ანგარიშით დაამარცხა – 4:0. მამაგეიშვილს არ უთამაშია, ლომინაძე კი მოედანზე 46-ე წუთზე შევიდა.

ლა ლიგა 2-ის მე-18 ტურში ლუკა გაგნიძის „გრანადა“ ხიხონის „სპორტინგს“ ესტუმრა და დამარცხდა – 0:1. ქართველ ნახევარმცველს ტრავმის გამო არ უთამაშია.

იური ტაბატაძის „კადისმა“ ერთ-ერთი აუტსაიდერ „სარაგოსას“ გასვლაზე მოუგო – 2:1. ტაბატაძეს ზედიზედ მეორე მატჩია არ უთამაშია.

უნგრეთის ჩემპიონატის მე-17 ტურში ილია ბერიაშვილის ბუდაპეშტის მტკ-სა და გიორგი ბერიძის და დავით კობოურის „უიპეშტს“ შორის შეხვედრა სტუმართა გამარჯვებით 4:3 დასრულდა – სამივე ქართველმა ძირითად შემადგენლობაში ითამაშა.

ესპანეთის ლა ლიგაში გიორგი მიქაუტაძის „ვილიარეალისა“ და „ლევანტეს“ მატჩი გადაიდო, რისი მიზეზიც უამინდობა (ვალენსიის რეგიონში უხვი ნალექი) გახდა.