კაშია შეიძლება ვიტესში დაბრუნდეს

საქართველოს ნაკრების კაპიტანი გურამ კაშია შესაძლოა არნემის „ვიტესში“ დაბრუნდეს. ქართელი მცველი ამ ნიდერლანდური გუნდის ისტორიაში გამორჩეული ფიგურაა. დაბრუნება კი მომავალ ზაფხულს მოხდება.

„კაშიას თამამად შეიძლება ვუწოდოთ „ვიტესის“ სიმბოლო. ის არნემის გუნდში მრავალი წლის განმავლობაში თამაშობდა. ახლა ბრატისლავის „სლოვანშია“. თუმცა მისი კონტრაქტი სეზონის ბოლოს იწურება და მომავალ ზაფხულში, შესაძლოა, „ვიტესში“ დაბრუნდეს“, – წერს Footballtransfers.

38 წლის ფეხბურთელი გაისად თავისუფალი აგენტი გახდება.
კაშია „ვიტესში“ 2010-2018 წლებში თამაშობდა, 293 მატჩი ჩაატარა, 23 გოლი გაიტანა და 11 საგოლე პასი შეასრულა. ბოლოს „ვიტესის“ კაპიტანიც გახდა.

ამჟამად კი „ვიტესს” საუკეთესო დროება არ უდგას. იყო გუნდის საერთოდ დაშლის საშიშროებაც, რასაც გურამიც გამოეხმაურა. „არავის უნდა, რომ “ვიტესი”, ეს უძველესი კლუბი, ერთი ხელის მოსმით გაქრეს. ეს დაუშვებელია”, – თქვა ადრე ქართველმა ფეხბურთელმა.
არნემული კლუბი ისევ დაუშვეს პროფესიულ ფეხბურთში და იმედი აქვთ, რომ მომავალი წლისთვის გუნდში ვითარება უკეთესობისაკენ შეიცვლება.